اسلام آباد ( اے بی این نیوز ) جوڈیشل مجسٹریٹ جنوبی کی عدالت نے ملزم ساحر حسن کے خلاف منشیات برآمدگی کے کیس میں پولیس کا پیش کردہ عبوری چالان قبول کرنے سے انکار کر دیا۔
دوران سماعت، ڈپٹی ڈسٹرکٹ پراسیکیوٹر نے پولیس کے چالان پر اعتراض کیا، جس کے بعد عدالت نے پولیس کے عبوری چالان کو قبول کرنے سے انکار کرتے ہوئے 26 مارچ تک پراسیکیوشن کے اعتراضات دور کرنے اور دوبارہ چالان پیش کرنے کا حکم دے دیا۔
ڈپٹی ڈسٹرکٹ پراسیکیوٹر نے بتایا کہ پولیس کے عبوری چالان میں کئی نقائص موجود ہیں، جن میں منشیات کی خرید و فروخت میں استعمال ہونے والے بینک اکاؤنٹ اور اس کے مالک کا ذکر نہیں کیا گیا۔ علاوہ ازیں، عبوری چالان میں شریک ملزمان اور ساحر حسن کے خریداروں کا بھی ذکر نہیں کیا گیا۔
