لاہور( اے بی این نیوز )انسٹی ٹیوٹ فار پبلک اوپینین ریسرچ نے پنجاب حکومت کی کارکردگی کے حوالے سے عوامی سروے کی رپورٹ جاری کی ہے۔
اس سروے میں پنجاب کے 36 اضلاع سے 6 ہزار سے زائد شہریوں کی رائے شامل کی گئی۔ رپورٹ کے مطابق، پنجاب حکومت کی کارکردگی سے 62 فیصد شہری مطمئن ہیں۔ تعلیم، صحت، انفراسٹرکچر اور امن و امان کے شعبوں میں حکومت کی کارکردگی کو سراہا گیا ہے، تاہم روزگار کی کمی پر 63 فیصد افراد نے حکومت کی کارکردگی پر عدم اطمینان کا اظہار کیا۔
سروے کے نتائج میں 57 فیصد شہریوں نے گزشتہ سال کے مقابلے میں صوبائی حکومت کی گورننس میں بہتری کو تسلیم کیا، جبکہ 17 فیصد نے اسے مزید خراب پایا۔ 24 فیصد افراد نے گورننس میں کسی بھی قسم کی تبدیلی کو نہیں محسوس کیا۔
وزیراعلیٰ پنجاب مریم نواز کی کارکردگی سے 59 فیصد شہری خوش ہیں، 16 فیصد ناراض ہیں اور 24 فیصد نے ان کی کارکردگی کو قابل قبول قرار دیا۔ 57 فیصد شہریوں نے مریم نواز کو گزشتہ ایک سال میں صوبے کے اہم عوامی مسائل اور گورننس کے چیلنجز کو مؤثر طریقے سے حل کرنے میں کامیاب پایا، جبکہ 36 فیصد نے انہیں اس میں ناکام قرار دیا۔
