اسلام آباد ( اے بی این نیوز )پاکستان کو افریقہ-1 سب میرین کیبل سے جوڑ دیا گیا ہے، جس کے ذریعے پاکستان میں ہیوی ڈیٹا ٹرانسمیشن کی صلاحیتوں والی جدید سب میرین کیبل کی سہولت فراہم کی گئی ہے۔ کراچی میں پی ٹی سی ایل ایکسچینج سے منسلک ہونے کے بعد، اس کیبل سسٹم کے ذریعے پاکستان کو عالمی ڈیجیٹل مراکز سے جوڑا جائے گا۔
پاکستان ٹیلی کمیونیکیشن کمپنی لمیٹڈ (پی ٹی سی ایل) نے افریقہ-1 کیبل سسٹم کنسورشیم میں باضابطہ شمولیت کے معاہدے کا اعلان کیا ہے۔ اس معاہدے سے پاکستان کے عالمی سطح پر روابط کو مزید مستحکم کرنے میں مدد ملے گی اور قومی ٹیلی کمیونیکیشن ڈھانچے کی ترقی ممکن ہو سکے گی۔
اس 10 ہزار کلومیٹر طویل کیبل سسٹم میں جدید ترین ٹیکنالوجیز شامل ہیں، جو پاکستان کو سعودی عرب، متحدہ عرب امارات، مصر، سوڈان، الجیریا، فرانس، کینیا، اور جبوتی جیسے اسٹریٹجک مقامات سے جوڑے گا۔
پی ٹی سی ایل کے نائب صدر، سید محمد شعیب نے کہا کہ افریقہ-1 کیبل سسٹم میں پاکستان کی شمولیت “ڈیجیٹل وژن 2030” کے مطابق ہے، جس کا مقصد ڈیجیٹل تقسیم کا خاتمہ کرنا اور لوگوں کو بااختیار بنانا ہے۔
افریقہ-1 کیبل سسٹم 2026 کے اوائل میں فعال ہو جائے گا، جس سے صارفین کو عالمی معیار کی انٹرنیٹ خدمات فراہم ہوں گی، اور ملکی معیشت میں جدت اور استحکام آئے گا۔
