اسلام آباد ( اے بی این نیوز )فیڈرل بورڈ آف ریونیو (ایف بی آر) نے پراپرٹی کی خرید و فروخت پر ایڈوانس انکم ٹیکس سے متعلق نئی زمینی حدود متعین کر دی ہیں۔
ایف بی آر کے سیکشن 236 سی اور کے تحت پراپرٹی کی خرید و فروخت پر ایڈوانس انکم ٹیکس کی نئی حدود متعارف کرائی گئی ہیں، اور اس حوالے سے آر ٹی او 1 کو مانیٹرنگ اور ٹیکس وصولی کی ذمہ داری سونپی گئی ہے۔
جاری کردہ نوٹیفکیشن کے مطابق، آر ٹی او 1 کی زمینی حدود میں کراچی کے مختلف علاقے شامل ہیں، جیسے ضلع جنوبی میں آرام باغ، سول لائنز، گارڈن، لیاری اور صدر ٹاؤن، ضلع کیماڑی میں بلدیہ، صائٹ، ماڑی پور اور ہاربر ٹاؤن، ضلع سنٹرل میں لیاقت آباد ٹاؤن، ضلع ایسٹ میں جمشید ٹاؤن، ضلع ویسٹ میں اورنگی ٹاؤن، اور کلفٹن کینٹونمنٹ، کراچی کنٹونمنٹ اور منوڑہ کنٹونمنٹ۔
چیف کمشنر آر ٹی او 1 ڈاکٹر فہیم محمد نے کہا کہ انکم ٹیکس آرڈیننس 2001 کے تحت پراپرٹی کی خرید و فروخت پر ایڈوانس انکم ٹیکس کی وصولی بہت اہم ہے۔ انہوں نے آر ٹی او 1 کے تحت تمام سب رجسٹرارز کو ایف بی آر کی جاری کردہ ویلیوئیشن ٹیبل کے مطابق پراپرٹی کی خرید و فروخت کو یقینی بنانے کی ہدایت کی تاکہ ایڈوانس انکم ٹیکس وصول کیا جا سکے۔
اس سلسلے میں، ود ہولڈنگ ایجنٹس اور سب رجسٹرارز کا جامع آڈٹ بھی کیا جائے گا تاکہ غلط ود ہولڈنگ ریٹ کے باعث ممکنہ ٹیکس کے نقصانات کا اندازہ لگایا جا سکے۔
