سندھ کے وزیر توانائی سید ناصر حسین شاہ نے اعلان کیا ہے کہ عالمی بینک کی مدد سے سندھ میں 200,000 اہل گھرانوں کو مفت سولر پینلز کی تقسیم 31 جولائی 2025 تک مکمل کر لی جائے گی۔
ایک اہم میٹنگ کے دوران، وزیر توانائی نے چیئرمین بلاول بھٹو اور وزیر اعلیٰ سندھ کے احکامات کے مطابق اس عمل کو تیز کرنے کی ہدایت دی۔ اس میٹنگ میں وزیر بلدیات سعید غنی بھی موجود تھے۔
وزیر توانائی نے مزید بتایا کہ تمام اضلاع میں ہر ماہ 1,600 سولر ہوم سسٹم تقسیم کیے جائیں گے، جس کا ہفتہ وار ہدف 400 سولر پینلز فی ضلع ہے۔ اس کے علاوہ، انہوں نے حکام کو ہدایت کی کہ موجودہ 50,000 سولر پینلز کو 30 دنوں کے اندر تقسیم کیا جائے اور اس کی پیش رفت کی رپورٹ فراہم کی جائے۔
سید ناصر حسین شاہ نے اس بات پر زور دیا کہ اس تقسیم کے عمل کو زیادہ سے زیادہ عوامی سطح پر ظاہر کرنے کے لیے مقامی انتظامیہ کے ساتھ مل کر خصوصی تقریبات کا انعقاد کیا جائے گا۔ اس اقدام کا مقصد صوبے میں توانائی کی بچت کو فروغ دینا اور عوام کو سستی اور ماحول دوست توانائی کی سہولت فراہم کرنا ہے۔
