اسلام آباد ( اے بی این نیوز )پاکستان میں اراکین پارلیمنٹ کی تنخواہوں اور مراعات میں اضافے کی منظوری دے دی گئی ہے۔ قومی اسمبلی کی فنانس کمیٹی نے اسپیکر ایاز صادق کی سربراہی میں متفقہ طور پر فیصلہ کیا کہ ایم این ایز اور سینیٹرز کی ماہانہ تنخواہ و مراعات 5 لاکھ 19 ہزار روپے مقرر کی جائیں گی۔
پارلیمانی ذرائع کے مطابق، تمام کٹوتیوں کے بعد وفاقی سیکریٹری کی تنخواہ اور الاؤنسز 5 لاکھ 19 ہزار روپے ماہانہ ہیں، اور اراکین پارلیمنٹ کو بھی اسی سطح کی سہولتیں فراہم کی جائیں گی۔
اس فیصلے کے تحت، اراکین پارلیمنٹ کو وفاقی سیکریٹری کے برابر مراعات ملیں گی، جن میں سرکاری گاڑی، پٹرول کی سہولت، رہائش، اور دیگر معاون خدمات شامل ہیں۔
مزید برآں، اسپیکر ایاز صادق نے اراکین کی جانب سے 10 لاکھ روپے ماہانہ تنخواہ کے مطالبے کو مسترد کر دیا ہے، تاہم پیپلز پارٹی، ن لیگ اور دیگر سیاسی جماعتوں نے تنخواہوں میں اضافے کی حمایت کی ہے، جبکہ پی ٹی آئی کے 67 اراکین نے بھی تحریری طور پر تنخواہوں میں اضافے کا مطالبہ کیا تھا۔
اس تمام معاملے کے بعد، فنانس کمیٹی کی سفارشات وزیراعظم شہباز شریف کو بھیج دی گئی ہیں، جن کے بعد مزید کارروائی کی جائے گی۔
