اسلام آباد: سابق وفاقی وزیر فواد چوہدری نے موجودہ سیاسی بحران کے حل کے لیے قومی حکومت کے قیام اور کچھ عرصے کے لیے مشترکہ وزیراعظم لانے کی تجویز دی ہے۔ میڈیا سے گفتگو کرتے ہوئے فواد چوہدری نے کہا کہ موجودہ حالات میں یہ ضروری ہے کہ ملک میں قومی حکومت قائم کی جائے تاکہ بحرانوں کا مؤثر حل نکالا جا سکے۔
فواد چوہدری نے کہا کہ پاکستان تحریک انصاف (پی ٹی آئی)، ن لیگ اور پیپلز پارٹی ملک کے لیے ضروری ہیں، اور ان تینوں جماعتوں کو مل کر ملک کی سیاست کی سمت طے کرنی چاہیے۔ انہوں نے یہ بھی کہا کہ بانی پی ٹی آئی عمران خان کو گرانے کے لیے عدالتی نظام کو متاثر کیا گیا ہے اور پاکستان کی معیشت، سیاست اور عدالتوں کو بٹھایا گیا ہے۔
سابق وزیر نے کہا کہ یہ خیال تھا کہ اداروں کو ختم کر کے عمران خان کی مقبولیت کو کم کیا جا سکے گا، لیکن وہ سروے کر کے دیکھ لیں، عمران خان کی مقبولیت آج بھی زیادہ ہے۔ اس لیے ان کے ساتھ مذاکرات کی ضرورت ہے تاکہ ملک میں سیاسی استحکام پیدا ہو۔
فواد چوہدری نے مزید کہا کہ پی ٹی آئی کارکنان کی رہائی اور کمیشن کا قیام ضروری ہے، اور اس کمیشن کا قیام سپریم کورٹ کے سینئر ججز کے ماتحت ہونا چاہیے۔ ان کا کہنا تھا کہ ملک کی بہتری کے لیے بات چیت کا آغاز کرنا ضروری ہے اور اگر حکومت پی ٹی آئی سے مذاکرات نہیں کرتی تو یہ ملک کے لیے اچھا نہیں ہوگا۔
انہوں نے خبردار کیا کہ مذاکرات نہ کرنے کی صورت میں تمام سیاسی جماعتیں لانگ مارچ کر سکتی ہیں، جو حکومت کے لیے مشکلات کا باعث بنے گا۔ فواد چوہدری نے یہ بھی کہا کہ بانی پی ٹی آئی کی رہائی کے بعد ملک کی سیاسی صورتحال میں بہتری آ سکتی ہے۔
