کوئٹہ میں ہونے والے خودکش دھماکے کے نتیجے میں پاکستان بھر کے ریلوے اسٹیشنز پر سیکیورٹی کو مزید سخت کر دیا گیا ہے اور ریلوے پولیس کو الرٹ کر دیا گیا ہے۔ ریلوے پولیس نے حیدرآباد اسٹیشن پر کارروائی کرتے ہوئے بغیر لائسنس پستول کے ساتھ ایک شخص کو گرفتار کر لیا۔
ترجمان ریلوے کے مطابق ٹرینوں کی آمد و روانگی کے دوران بم ڈسپوزل اسکواڈ کو مکمل چیکنگ کی ہدایت کی گئی ہے، اور غیر متعلقہ افراد کو پلیٹ فارمز پر داخل ہونے سے روک دیا گیا ہے۔ انہوں نے مزید بتایا کہ ریلوے پولیس کے آئی جی کی ہدایات کے مطابق تمام ریلوے اسٹیشنز کی سیکیورٹی میں اضافہ کیا گیا ہے اور ایس پیز کو فوری طور پر مراسلہ جاری کر دیا گیا ہے۔
ترجمان نے بتایا کہ کوئٹہ سمیت ملک بھر کے تمام ریلوے اسٹیشنز اور ٹرینوں کی سیکیورٹی ریڈ الرٹ کر دی گئی ہے اور داخلی و خارجی راستوں پر سیکیورٹی کو مزید مضبوط کیا جا رہا ہے۔ مشکوک افراد پر کڑی نظر رکھی جا رہی ہے اور ریلوے اسٹیشنز میں غیر متعلقہ افراد کے داخلے پر پابندی عائد کر دی گئی ہے۔ اس کے علاوہ سیکیورٹی آلات کی تعداد میں اضافہ کر کے ان کا مؤثر استعمال کرنے کے لیے احکامات جاری کیے گئے ہیں۔
دوسری طرف، حیدرآباد اسٹیشن پر ہونے والی کارروائی کے دوران ایک ملزم سے بغیر لائسنس پستول اور گولیاں برآمد کی گئیں، جس پر اسے گرفتار کر لیا گیا۔ پولیس کا کہنا تھا کہ ملزم سے مزید تفتیش کی جا رہی ہے۔
