اسلام آباد ( اے بی این نیوز )سوئی ناردرن گیس پائپ لائینز لمیٹڈ کے شیئر ہولڈرز نے مالی سال2022-23 کے لیے% 45 نقد ڈیویڈنڈ کی منظوری دے دی۔
کمپنی اپنے60 سالہ سفر کی خوشی منا رہی ہے۔ سوئی ناردرن گیس پائپ لائینز لمیٹڈ (SNGPL) کے شیئر ہولڈرز کا سالانہ اجلاس عام بروز بدھ، 21 اگست 2024 کو پرل کانٹینینٹل ہوٹل، لاہور میں منعقد ہوا۔ کمپنی کے شئیر ہولڈرز نے مالی سال 2022-23 کے سالانہ اکاؤنٹس کی منظوری دی۔
اس سال کمپنی نے 10,564 ملین روپے بعد از ٹیکس منافع کمایا اور فی شئیر آمدنی 16.66 روپے رہی۔ شئیر ہولڈرز نے بورڈ آف ڈائریکٹرز کی سفارش پر 45%نقد ڈیویڈنڈ یعنی 4.50 روپے فی شئیر کی بھی منظوری دی۔ اس کے علاوہ، کمپنی کے شئیر ہولڈرز نے مالی سال 2023-24 کے لیے میسرز اے ایف فرگوسن، چارٹرڈ اکاؤنٹنٹ، کی بطور آڈیٹرز تقرری کی منظوری بھی دے دی۔
چئیرمین، محمد اسماعیل قریشی نے شئیر ہولڈرز کو بتایا کہ کمپنی نے مالی سال 2022-23کے دوران سخت چیلنجز کے باوجود نمایاں پیش رفت حاصل کی۔ انہوں نے مزید کہا کہ کمپنی کی منافع 10.36 ارب روپے سے بڑھ کر 10.56 ارب روپے تک پہنچ گئی ہے، جو کہ ایک متحرک ریگولیٹری ماحول میں کمپنی کی استقامت کو ظاہر کرتی ہے۔
انہوں نے اس مستحکم منافع کی بنیاد میں شامل اہم عوامل کا ذکر کرتے ہوئے کہا کہ متعدد شعبوں میں اسٹریٹیجک آپریشنل بہتری، خصوصاً غیر حساب شدہ گیس (یو ایف جی) کے نقصانات میں کمی، شامل ہیں۔ یو ایف جی نقصانات 5.58% سے کم ہو کر 5.15% تک پہنچ گئے، جس کے نتیجے میں 5.9 بی سی ایف گیس اور تقریباً 6 ارب روپے کی مالی بچت ہوئی۔
آپریشنل بہتری اور تکنیکی ترقی پر روشنی ڈالتے ہوئے، چئیرمین نے کہا کہ کمپنی نے آپریشنل صلاحیت اور ڈیجیٹائزیشن کے اقدامات میں نمایاں پیش رفت کی۔ انہوں نے یو ایف جی نقصانات سے نمٹنے کے لیے اہم اقدامات کا ذکر کیا جن میں صنعتی کلسٹرز کی تقسیم اور علیحد گی، جدید مانیٹرنگ ٹیکنالوجیز کی تنصیب جیسے کہ سائبر لاکس اور آئی او ٹی پر مبنی پریشر ٹرانسڈیوسرز شامل ہیں۔
اس کے علاوہ، بڑے شہروں جیسے اسلام آباد، راولپنڈی اور لاہور میں نیٹ ورک کی رکاوٹوں کو دور کرنے کے لیے میگا پروجیکٹس شروع کیے گئے، جہاں بڑے قطر کے پائپ لائینز اور نئے سیلز میٹر اسٹیشنز (ایس ایم ایس) نصب کیے گئے تاکہ صلاحیت میں اضافہ ہو۔ جاری ڈیجیٹائزیشن کے اقدامات میں سکاڈا (SCADA) کے ذریعے آن لائن صنعتی صارفین کی مانیٹرنگ اور بہتر نیٹ ورک مینجمنٹ کے لیے پوری کمپنی میں جی آئی ایس (GIS) سسٹم کا نفاذ شامل ہے۔
شئیر ہولڈرز کے ساتھ تفصیلی تفاعلی سیشن منعقد کیا گیا۔ متعدد تجاویز رقم کی گئیں اور شئیر ہولڈرز کو ان کے سوالات کے مطابق اطمینان بخش جوابات دیے گئے۔
چیئرمین محمد اسماعیل قریشی، ڈائریکٹر طارق اقبال خان، ڈائریکٹر فاریہ رحمان صلاح الدین، ڈائریکٹر سعادت علی خان، فیصل اقبال، ڈپٹی مینیجنگ ڈائریکٹر (سروسز)، کامران اکرم، چیف فنانس آفیسر اور امتیاز محمود، سینئر جنرل مینیجر (کارپوریٹ افیئرز) / کمپنی سیکریٹری بھی ذاتی طور پر موجود تھے جبکہ ڈائریکٹر احمد چنائے اور ڈائریکٹر محمد رمضان نے ویڈیو لنک کے ذریعے اجلاس عام میں شرکت کی۔ کمپنی کی سینئر مینجمنٹ بھی سالانہ اجلاس عام میں موجود تھی۔
