ڈھاکہ ( نیوز ڈیسک )ڈھاکہ میں پاکستانی ہائی کمیشن نے بنگلہ دیش میں زیر تعلیم پاکستانی طلباء کے لیے ایک ایڈوائزری جاری کی ہے کہ وہ احتجاج سے دور رہیں اور خود کو اپنے کیمپس کے ہاسٹلز تک محدود رکھیں۔
ذرائع کے مطابق بنگلہ دیش نے بدھ کو سرکاری ملازمتوں میں کوٹے کے خلاف مظاہروں میں چھ افراد کی ہلاکت کے بعد ملک بھر کے اسکولوں اور یونیورسٹیوں کو غیر معینہ مدت کے لیے بند کرنے کا حکم دیا۔
سول سروس کی بھرتی کی پالیسیوں کے خلاف ہفتوں میں بڑھتے ہوئے مظاہروں کے بعد ہر ہائی اسکول، یونیورسٹی اور اسلامی مدرسے کو اگلے نوٹس تک بند رہنے کا کہا گیا تھا۔منگل کو تشدد میں نمایاں اضافہ دیکھنے میں آیا کیونکہ مظاہرین اور حکومت کے حامی طلباء گروپوں نے ایک دوسرے پر اینٹوں اور بانس کی سلاخوں سے حملہ کیا، اور پولیس نے ریلیوں کو آنسو گیس اور ربڑ کی گولیوں سے منتشر کیا۔
بنگلہ دیش کی وزارت تعلیم کے ترجمان ایم اے کھیر نے کہا کہ شٹ ڈاؤن کا حکم طلباء کی سلامتی کے لیے جاری کیا گیا ہے۔منگل کے روز کم از کم چھ افراد مارے گئے جب مظاہرین کئی شہروں میں ایک اور دن کے لئے متحرک ہوئے، وزیر اعظم شیخ حسینہ اور سپریم کورٹ کی طرف سے اپنی کلاسوں میں واپسی کے پہلے کالوں کو ٹھکرا دیا۔
غیر مستحکم صورتحال کو مدنظر رکھتے ہوئے پاکستان ہائی کمیشن نے پاکستانی طلباء کو مشورہ دیا کہ وہ انتہائی احتیاط برتیں اور اپنے تحفظ کے لیے ہر اقدام کو اپنائیں۔نائب وزیراعظم اور وزیر خارجہ اسحاق ڈار نے پاکستانی ہائی کمشنر سید معروف کو فون کرکے پاکستانیوں کی خیریت دریافت کی۔
سید معروف نے نائب وزیراعظم کو سیکیورٹی کی صورتحال اور بنگلہ دیش میں مقیم پاکستانیوں کی حفاظت کو یقینی بنانے کے لیے ہائی کمیشن کی جانب سے اٹھائے گئے اقدامات سے آگاہ کیا۔ہائی کمشنر نے کہا کہ انہوں نے کسی بھی صورتحال میں پھنسے پاکستانیوں کی سہولت کے لیے ہیلپ لائن قائم کی ہے۔
اسحاق ڈار نے ہائی کمشنر کو ڈھاکہ کے کیمپسز میں مقیم پاکستانی طلباء کا خیال رکھنے کی ہدایت کی۔انہوں نے ہائی کمشنر کو پاکستانی طلباء کے تحفظ کو یقینی بنانے کے لیے مقامی حکام سے رابطے میں رہنے کا مشورہ بھی دیا۔
مزید پڑھیں: پاکستان ون ڈے اور ٹی ٹوئنٹی سیریز کے لیے مارچ،اپریل 2025 میں نیوزی لینڈ کا دورہ کریگا
