کراچی(نیوز ڈیسک )وزیر اعلیٰ سندھ مراد علی شاہ نے ہفتہ کو کہا کہ اگلے سال کے لیے جی ڈی پی کی شرح نمو 3.5 فیصد پر بات کی جا رہی ہے۔ جی ڈی پی کے حوالے سے وفاق کے ساتھ تعاون کی کوششیں جاری ہیں۔پوسٹ بجٹ پریس کانفرنس سے خطاب کرتے ہوئے وزیراعلیٰ سندھ نے کہا کہ کل بجٹ 3.056 ٹریلین روپے ہے۔
سندھ حکومت کا بجٹ ہر سال زیادہ ہے، ہمیں وفاق سے 1900 ارب روپے ملنے کی امید ہے۔مراد نے مزید کہا کہ ہمارا ترقیاتی بجٹ دوسرے صوبوں سے زیادہ ہے۔ سندھ کے بجٹ کا 31 فیصد ترقیاتی کاموں پر جاتا ہے۔
وفاقی حکومت نے ہماری سکیمیں ختم کر دی ہیں، وہ سندھ کو پاکستان سمجھ کر ترقیاتی سکیمیں دیں۔ نگران حکومت نے منتخب حکومت کی ترقیاتی سکیمیں روک دیں۔
ان کا مزید کہنا تھا کہ بجٹ مشکل حالات میں بنایا گیا ہے۔ نگراں حکومت کے بجٹ میں شامل ترقیاتی سکیموں کی بندش کے باعث سست روی کا سامنا ہے۔ موجودہ بجٹ میں سیلاب متاثرین کی بحالی کے لیے اقدامات کیے گئے ہیں۔
انہوں نے یہ بھی بتایا کہ سندھ کابینہ نے بجٹ میں کوئی نئی اسکیم شامل نہ کرنے کا فیصلہ کیا ہے بلکہ تمام جاری اسکیموں کو رواں سال مکمل کرنے کا فیصلہ کیا ہے اور اگلے سال ہم ترقی کی طرف جائیں گے۔ تاہم، اس کا مطلب یہ نہیں ہے کہ اس سال ہم ترقی کی طرف نہیں جائیں گے۔
وزیر اعلیٰ سندھ نے مزید کہا کہ 3.056 ٹریلین روپے میں سے 1912 ارب روپے کرنٹ ریونیو اخراجات کے لیے ہیں، 184 ارب روپے کرنٹ کیپیٹل اخراجات کے لیے ہیں (قرض کی ادائیگی سمیت دیگر فنڈز میں جائیں گے)، اگلے مالی سال 1 ٹریلین روپے سے زائد ترقیاتی کاموں پر خرچ کیے جائیں گے۔
مزید پڑھیں: خواتین کو ہراسگی سے بچاتے ہوئے ایس پی سٹی اسلام آباد خان زیب زخمی،8 ملزمان گرفتار
