اسلام آباد(نیوز ڈیسک )سال 2024 کا تیسرا پولیو کیس بلوچستان کے ضلع قلعہ عبداللہ سے رپورٹ ہوا ہے۔نیشنل انسٹی ٹیوٹ آف ہیلتھ کی ریجنل ریفرنس لیبارٹری برائے پولیو کے مطابق، قلعہ عبداللہ کی دروزئی یونین کونسل میں 20 اپریل کو فالج کی علامات پیدا کرنے والے ایک بچے کے پاخانے کے نمونوں میں وائلڈ پولیو وائرس ٹائپ 1 (WPV1) کا پتہ چلا۔
مزید پڑھیں: معروف اداکار طلعت حسین طویل علالت کے بعد انتقال کرگئے
نیشنل ہیلتھ سروسز کے وزیر اعظم کے کوآرڈینیٹر ڈاکٹر ملک مختار احمد بھرتھ نے کہا کہ یہ انتہائی افسوسناک ہے کہ بلوچستان میں اس سال ایک اور بچہ پولیو سے متاثر ہوا ہے۔انہوں نے مزید کہا کہ پولیو ایک خوفناک بیماری ہے جو نہ صرف بچے کی بلکہ پورے خاندان کی زندگی کو بدل دیتی ہے۔
انہوں نے کہا، “حکومت پولیو کے قطرے پلانے کے متعدد راؤنڈز میں ہمارے شہریوں کی دہلیز پر پولیو ویکسین لا رہی ہے۔میں خاندانوں سے گزارش کرتا ہوں کہ وہ اس بیماری کے بچوں کو لاحق خطرے کو سمجھیں اور اس بات کو یقینی بنائیں کہ وہ اپنے پانچ سال سے کم عمر کے تمام بچوں کو پولیو کے قطرے پلائیں جب پولیو ورکر ان کے گھر آئے۔
پولیو کے خاتمے کے لیے نیشنل ایمرجنسی آپریشن سینٹر کے کوآرڈینیٹر ڈاکٹر شہزاد بیگ نے کہا کہ وائرس کی ابتداء کی شناخت کے لیے فوری طور پر کیس کی تفصیلی تحقیقات شروع کی جائیں گی، ایسی آبادیوں کو تلاش کیا جائے گا جو ویکسینیشن سے محروم رہ گئے ہوں اور اس کے پھیلاؤ کو روکنے کے لیے اصلاحی اقدامات کیے جائیں۔
انہوں نے مزید کہا کہ ہم نے اس سال پہلے ہی پولیو کے قطرے پلانے کی چار مہمیں چلائی ہیں، جن میں بچوں کی قوت مدافعت کو بڑھانے کے لیے دو ملک گیر مہمیں شامل ہیں اور ہم جون میں ایک اور مہم چلائیں گے۔بلوچستان میں رواں سال پولیو کا یہ تیسرا کیس ہے اور تین سال بعد قلعہ عبداللہ سے پہلا کیس رپورٹ ہوا ہے۔گزشتہ سال ملک میں پولیو کے چھ کیسز رپورٹ ہوئے تھے جن میں سے چار خیبرپختونخوا اور دو کراچی سے تھے۔
