پشاور(نیوز ڈیسک )خیبرپختونخوا کے دارالحکومت پشاور میں احتجاجی مظاہرے جاری ہیں جب کہ محکمہ موسمیات نے آئندہ 24 گھنٹوں میں درجہ حرارت 42 ڈگری سینٹی گریڈ تک جانے کی پیشگوئی کی ہے۔تفصیلات کے مطابق پشاور میں رحمان بابا گرڈ سٹیشن کے باہر مظاہرین جمع ہوئے اور احتجاج کیا، جس کی قیادت پاکستان تحریک انصاف (پی ٹی آئی) کے رکن صوبائی اسمبلی فضل الٰہی کر رہے تھے۔
مزید پڑھیں: زخمی صحافی نصراللہ گڈانی کراچی کے اسپتال میں انتقال کرگئے
رحمان بابا گرڈ سٹیشن کو بھی بند کر دیا گیا ہے۔مظاہرین کا کہنا تھا کہ لوڈشیڈنگ جاری رہی تو گرڈ اسٹیشن کا کنٹرول سنبھال لیں گے۔ پی ٹی آئی رہنما فضل الٰہی نے ہزار خوانی گرڈ اسٹیشن بند کرنے کی دھمکی دے دی۔فضل الٰہی نے بتایا کہ ہزار خوانی گرڈ سٹیشن کی بندش سے اسلام آباد کی بجلی بھی منقطع ہو جائے گی۔
ادھر محکمہ موسمیات نے پشاور میں موسم گرم اور خشک رہنے کی پیش گوئی کرتے ہوئے کہا ہے کہ ہوا میں نمی کا تناسب 27 فیصد ریکارڈ کیا گیا ہے۔محکمہ موسمیات کا کہنا ہے کہ پشاور میں درجہ حرارت 23 ڈگری سینٹی گریڈ ریکارڈ کیا گیا ہے، آئندہ 24 گھنٹوں میں پارہ 42 ڈگری سینٹی گریڈ تک جانے کا امکان ہے۔
محکمہ موسمیات کی جانب سے یہ بھی پیش گوئی کی گئی ہے کہ سب سے زیادہ درجہ حرارت ڈیرہ اسماعیل خان میں 45 ڈگری سینٹی گریڈ ریکارڈ کیا گیا، کوہستان، دیر، سوات میں گرج چمک کے ساتھ بارش کا امکان ہے۔
