اسلام آباد(نیوز ڈیسک ) ملک میں ہفتہ وار بنیادوں پر مہنگائی کی شرح میں کمی کا سلسلہ جاری ہے، ہفتے کے دوران مہنگائی کی شرح میں 0.34 فیصد کمی ریکارڈ کی گئی جس کے بعد ہفتہ وار بنیادوں پر مہنگائی کی سالانہ شرح 21.31 فیصد پر پہنچ گئی۔ادارہ شماریات کے جاری کردہ ہفتہ وار اعداد و شمار کے مطابق ہفتے کے دوران 18 اشیاء سستی اور 12 مہنگی ہوئیں جبکہ 21 اشیاء کی قیمتوں میں استحکام رہا۔
ادارہ شماریات کی جانب سے جاری کردہ ہفتہ وار مہنگائی رپورٹ کے مطابق رواں ہفتے کے دوران لہسن کی قیمت میں 43 روپے 46 پیسے فی کلو، چکن کی قیمت میں 20 روپے 21 پیسے اور آٹے کے 20 کلو تھیلے کی قیمت میں 88 روپے 89 پیسے کی کمی ہوئی۔گزشتہ ایک ہفتے کے دوران پیاز کی قیمت میں 1.97 روپے فی کلو اور انڈے کی قیمت میں 3.53 روپے فی درجن کی کمی ہوئی ہے۔
مزید پڑھیں: ستاروں کی روشنی میں آج بروز ہفتہ،25جولائی 2024 آپ کا دن کیسا رہے گا ؟
اسی طرح باسمتی چاول، لال دال، سبز چنے اور ٹماٹر سستی ہونے والی اشیاء میں شامل ہیں جب کہ گھریلو ایل پی جی سلنڈر کی قیمت میں بھی 93 روپے 12 پیسے کی کمی ریکارڈ کی گئی۔ادارہ شماریات کی ہفتہ وار رپورٹ کے مطابق گائے کے گوشت کی قیمت میں 4 روپے 62 پیسے فی کلو، مٹن کی قیمت میں 4 روپے 47 پیسے اور دہی کی قیمت میں 1 روپے 23 پیسے فی کلو اضافہ ہوا۔ جبکہ گرم مصالحہ، گڑ، چائے کی پتی اور سگریٹ بھی مہنگی اشیاء میں شامل ہیں۔
ادارہ شماریات کے مطابق رواں ہفتے کے دوران کوکنگ آئل، بجلی، پیٹرولیم مصنوعات سمیت 21 اشیا کی قیمتوں میں استحکام رہا۔
