لاہور( نیوز ڈیسک) لاہور سمیت ملک کے میدانی علاقوں میں شدید دھند برقرار ، متعدد شاہراہوں پر ٹریفک کی روانی شدید متاثر ، دوسری جانب موٹروے پولیس کے مطابق دھند کی وجہ سے حد نگاہ صفر ہونے پر موٹرویز کو مختلف مقامات سے بند کر دیا، موٹروے ایم 1 کو رشکئی سے پشاور ٹول پلازہ اور برہان سے صوابی، ایم 2 کو اسلام آباد ٹول پلازہ سے ٹھوکر نیاز بیگ بند ۔ترجمان کے مطابق ایم 3 کو فیض پور انٹرچینج سے درخانہ، ایم 4 کو فیصل آباد سے پنڈی بھٹیاں انٹرچینج، ایم 5 کو ظاہر پیر سے اُوچ شریف اور رحیم یار خان سے روہڑی، ایم 11 کو محمود بوٹی سے سمبڑیال ٹول پلازہ تک ہر قسم کی ٹریفک کیلئے بند کر دیا گیا۔ترجمان موٹروے پولیس نے کہا کہ موٹرویز عوامی حفاظت اور محفوظ سفر یقینی بنانے کیلئے بند کیا گیا، شہری دن کے اوقات پر سفر کرنے کو ترجیح دیں، صبح 10 سے شام 6 بجے تک دھند کے موسم میں بہترین سفری اوقات ہیں۔سید عمران احمد نے مزید کہا ہے کہ مسافر ڈرائیونگ کے دوران آگے اور پیچھے دھند والی لائٹس کا استعمال، اگلی گاڑی سے مناسب فاصلہ رکھیں اور تیز رفتاری سے پرہیز کریں، کسی بھی معلومات اور مدد کیلئے ہیلپ لائن 130 سے رابطہ کریں۔