مظفرآباد(نیوز ڈیسک) آزاد کشمیر کا بلامقابلہ وزیراعظم منتخب ہونے پر چوہدری انوار الحق نے کہا کہ میں نے آزاد حیثیت میں الیکشن لڑا ، پی ڈی ایم اور پی ٹی آئی نے ووٹ دیا،اس ایوان میں کون اپوزیشن میں ہوگا اور کون حکومت میں یہ آنے والا وقت بتائے گا، جتنے دن کام کروں گا ریاست کے بچے بچے کو پتا چلے گا، میں تربیت یافتہ ہوں کسی حادثے میں نہیں آیا ،اب ہر شہری ریاست کے وزیراعظم کے احتساب کا پورا حق رکھے گا۔ تفصیلات کے مطابق نومنتخب وزیراعظم آزاد کشمیر چوہدری انوار الحق نے قانون ساز اسمبلی سے پہلے خطاب میں کہا کہ ہمیں اپنے رویوں میں تبدیلی لانی ہے، جنہوں نے مجھے ووٹ دیئے میں سب کا شکر گزار ہوں ، ایک سیاسی کارکن کی معراج ہے کہ ایک بی ڈی ممبر سے ہوتے ہوئے وزیراعظم بنا، کوشش کروں گا جتنے دنوں کا اقتدار ہو تحریک آزادی کشمیر کے حوالے سے سرحد پار کشمیریوں کو پتا چلے کسی ایسے شخص کو اللہ نے اقتدار دیا جس کے دل میں آپ بستے ہیں۔ اس کے علاوہ قائد ایوان کے انتخاب کے بعد خطاب کرتے ہوئے پیپلز پارٹی آزاد کشمیر کے صدر چوہدری یاسین اور مسلم لیگ (ن) کے صدر شاہ غلام قادر نے نو منتخب وزیراعظم چوہدری انوار الحق کو مبارکباد دی جبکہ اپوزیشن لیڈر چوہدری لطیف اکبر نے خطاب میں کہا امید ہے کہ تحریک آزادی کشمیر اور ریاست کی تعمیر و ترقی کے لیے نو منتخب وزیراعظم اپنا بھرپور کردار ادا ادا کریں گے۔ واضح رہے کہ چوہدری انوار الحق آزاد کشمیر کے 15ویں وزیراعظم منتخب ہوئے ہیں وہ 2 بار اسپیکر رہ چکے ہیں۔