راولپنڈی (اے بی این نیوز) اپوزیشن لیڈر آزاد کشمیر اور صدر مسلم لیگ (ن) آزاد کشمیر، شاہ غلام قادر نے آئندہ انتخابات کے پیش نظر اہم بیان جاری کرتے ہوئے پیپلز پارٹی اور بیوروکریسی کو شدید تنقید کا نشانہ بنایا ہے۔ شاہ غلام قادر نے آزاد کشمیر میں ہیلتھ کارڈ اسکیم کے حوالے سے مبینہ کمیشن خوری کے منصوبے پر بھی شدید تشویش کا اظہار کیا۔
ان کا کہنا تھا کہ اسٹیٹ لائف کی جانب سے انکار کے بعد نجی انشورنس کمپنیوں کے ساتھ کمیشن طے کر کے آزاد کشمیری عوام کے ساتھ دھوکہ دینا کسی صورت قابل قبول نہیں۔ انہوں نے واضح کیا کہ عوام کی صحت اور ان کے مفادات کے ساتھ کھیلنا ناقابل برداشت عمل ہے اور حکومت اس اسکیم کے ذریعے عوام کو مالی نقصان پہنچانے کی کوشش کر رہی ہے۔
شاہ غلام قادر نے پیپلز پارٹی پر بھی تنقید کرتے ہوئے کہا کہ حکومت عوامی فلاحی منصوبوں کو سیاسی فوائد کے لیے استعمال کر رہی ہے اور بیوروکریسی بھی اس میں مکمل طور پر شامل ہے۔ انہوں نے زور دیا کہ آزاد کشمیر کے عوام کو ایسے منصوبوں میں دھوکہ دینے کی کوئی اجازت نہیں دی جائے گی۔
اپوزیشن لیڈر نے آئندہ انتخابات میں عوامی حمایت حاصل کرنے کے لیے وعدہ کیا کہ مسلم لیگ (ن) عوام کے مفادات کا تحفظ یقینی بنائے گی اور تمام اسکیموں میں شفافیت کو یقینی بنایا جائے گا۔
مزید پڑھیں: نئےسال کاتحفہ، پٹرول کی قیمت میں بڑی کمی؟
