اسلام آباد(بشارت عباسی)پاکستان پیپلز پارٹی نے آزاد کشمیر میں اپنی حکومت بنانے کا فیصلہ کرتے ہوئے وزیراعظم چوہدری انوارالحق کے خلاف تحریک عدم اعتماد پیش کردی ہے، اور نوجوان رہنما راجا فیصل ممتاز راٹھور کو نیا قائد ایوان نامزد کیا ہے۔
فیصل ممتاز راٹھور 11اپریل 2078کو راولپنڈی میں پیدا ہوئے ۔فیصل ممتاز راٹھور سابق وزیراعظم آزاد کشمیر ممتاز حسین راٹھور مرحوم کے فرزند ہیں۔
فیصل راٹھور کی والدہ بیگم فرحت راٹھور بھی آزاد کشمیر قانون ساز اسمبلی کی رکن اور پیپلز پارٹی شعبۂ خواتین کی صدر رہیں ۔ فیصل راٹھور کا خاندان آزاد کشمیر میں پاکستان پیپلز پارٹی کے بانیوں میں شمار ہوتا ہے۔
فیصل راٹھور نے ابتدائی تعلیم راولپنڈی اور گریجویشن پنجاب یونیورسٹی سے کی۔ فیصل راٹھور کے والد 1975 کے انتخابات کے بعد سنیئر وزیر ، 1990 میں وزیراعظم ، 1991 میں اپوزیشن لیڈر اور 1996 میں اسپیکر قانون ساز اسمبلی بنے تھے ۔
ممتاز حسین راٹھور کی وفات کے بعد 1999 میں ان کے بڑے بیٹے مسعود ممتاز راٹھور بقیہ مدت کے لیے ممبر قانون ساز اسمبلی منتخب ہوئےتھے ۔ فیصل راٹھور نے ایل اے-17 حویلی کہوٹہ سے پہلی بار 2006 کے انتخابات میں حصہ لیا۔
فیصل راٹھور 2011 کے انتخابات میں پہلی بار پاکستان پیپلز پارٹی کے ٹکٹ پر ممبر قانون ساز اسمبلی منتخب ہوئے اور چوہدری عبدالمجید کی کابینہ میں وزیرِ اکلاس اور وزیرِ برقیات رہے
فیصل راٹھور 2016 میں ایک سیاسی مقدمے میں گرفتار بھی ہوئے، بعد ازاں بے گناہ قرار پائے۔ فیصل راٹھور 23 مارچ 2017 کو پاکستان پیپلز پارٹی آزاد کشمیر کے سیکرٹری جنرل بنے اور تاحال پارٹی کے سیکرٹری جنرل بھی ہیں ۔
فیصل راٹھور دوسری بار 2021 کے انتخابات میں ممبر قانون ساز اسمبلی منتخب ہوئے اور بھرپور اپوزیشن کا کردار ادا کیا۔ فیصل راٹھور 2023 میں چوہدری انوار الحق کی اتحادی حکومت میں وزیر لوکل گورنمنٹ اینڈ رورل ڈیولپمنٹ بنے ۔
فیصل راٹھور وزیراعظم چوہدری انوارالحق حکومت کی جانب سے عوامی ایکشن کمیٹی کے ساتھ مذاکراتی کمیٹی کے سربراہ بھی ہیں ۔ فیصل ممتاز راٹھور اپنی صلح جو، نرم گفتار اور غیر متنازعہ شخصیت کی بدولت سیاسی و عسکری حلقوں، عوامی ایکشن کمیٹی اور عوام میں بھی اچھی شہرت رکھتے ہیں۔
فیصل راٹھور پاکستان کے نیشنل میڈیا کا تجربہ بھی رکھتے ہیں اور بول ٹی وی پر مستقل پروگرام کرتے رہے ہیں
فیصل ممتاز راٹھور پارٹی میں بلاول بھٹو زرداری اور محترمہ فریال تالپور کےانتہائی بااعتماد شمار ہوتے ہیں۔ فیصل ممتاز راٹھور پارٹی کے نظریاتی اور متوسط طبقہ کی نمائندگی کرتے ہیں۔
مزید پڑھیں۔آئینی عدالت کے پہلے چیف جسٹس امین الدین نے عہدے کا حلف اٹھا لیا
