واشنگٹن(نیوزڈیسک) عالمی بینک نے اپنی رپورٹ میں واضح کیا ہے کہ دنیا کے رواں سال دنیا بھر کو معاشی سست روی کا سامنا ہوگا۔۔عالمی بینک کی جانب سے جاری گلوبل اکنامک پروسپیکٹ رپورٹ میں تخمینہ لگایا گیا ہے کہ 2023 میں عالمی شرح نمو 1.7 فیصد رہنے کا امکان ہے جس کے بارے میں 6ماہ پہلے 3فیصد کی پیشگوئی کی گئی تھی۔عالمی بینک نے خبردار کیا ہے کہ عالمی معیشت کو کساد بازاری کا سامنا ہوسکتا ہے جب کہ 2023 میں معاشی شرح نمو میں نمایاں کمی آئے گی۔ خاص طور پر ترقی یافتہ ممالک کی شرح نمو 2023 میں 0.5 فیصد رہنے کا امکان ہے جو 2022 میں 2.5 فیصد تھی۔دنیا کی سب سے بڑی معیشت امریکا کی شرح نمو 0.5 فیصد رہنے کی پیشگوئی کی گئی ہے جو 1970 کے بعد سے اب تک کی سب سے کم شرح ہے۔