نیویارک (نیوزڈیسک)عالمی ادارہ صحت حکام نے غزہ میں انسانی بحران کا خدشہ ظاہر کرتے ہوئے خبردار کیا کہ جنگ زدہ غزہ میں بمباری سے زیادہ بیماریوں سے موت کے خطرات لاحق ہیں۔خوفناک بمباری، محاصرے کے بعد غزہ کے شہریوں کو بیماریوں نے گھیر لیا۔ بیماریوں سے اموات کا خطرہ بڑھ گیا۔ صحت کا نظام تیزی سے معمول پرنہ لایا گیا تو شدید خطرات لاحق ہونگے۔ ترجمان عالمی ادارہ صحت مارگریٹ ہیرس نے مزید کہا کہ بالآخر اگر ہم صحت کے اس نظام کو دوبارہ فعال نہ کر سکے تو ہم بمباری سے زیادہ لوگوں کو بیماری سے مرتے ہوئے دیکھیں گے۔انہوں نے شمالی غزہ میں الشفاء ہسپتال کے منہدم ہونے کو ایک المیہ قرار دیا اور اسرائیلی فورسز کے ہاتھوں اس کے طبی عملے کی حراست میں لینے پر تشویش کا اظہار کیا۔عالمی ادارہ صحت کے ڈائریکٹر جنرل ٹیڈروس اذانوم گیبریئس نے غزہ میں انسانی بنیادوں پر جنگ بندی کے نفاذ اور پٹی میں امداد کے داخلے کا خیرمقدم کرتے ہوئے اسے “صحیح سمت میں ایک قدم” قرار دیا۔انہوں نے’ایکس‘پلیٹ فارم پر اپنے اکاؤنٹ میں کہا کہ “ہم شہریوں کی تکالیف کو ختم کرنے کے لیے ایک پائیدار جنگ بندی کا مطالبہ کرتے رہیں گے”۔
