غزہ : (نیوز ڈیسک ) غزہ میں اسرائیل کی جارحیت 43ویں دن میں داخل، ، عرب اور عالمی سفارتی کوششوں کے باوجود جنگ بندی نہ ہوسکی، اسرائیلی وحشیانہ بمباری سے شہادتوں کی داستان رقم ،76ہزار رہائشی عمارتیں ملبے کا ڈھیر ، شہدا کی مجموعی تعدادساڑھے 11ہزار سے تجاوزجن میں 4ہزار 660 بچے ، 3ہزار سے زائد خواتین شامل ، عالمی میڈیا کے مطابق فلسطینی ہلال احمر نے کہا ہے کہ اسرائیلی فورسز نے غزہ کی پٹی میں معمدانی ہسپتال جسے الاھلی عرب ہسپتال بھی کہتے ہیں پر دھاوا بول دیا ہے۔المغازی میں فضائی حملے کےدوران مزید 9افراد شہید ہوگئے جبکہ 26 ہسپتال مکمل طور پرتباہ ہوگئے۔ہلال احمر نے ایک مختصر بیان میں کہا کہ اسرائیلی ٹینکوں نے ہسپتال کو گھیرے میں لے لیا ، اس کی ایمبولینسز کا عملہ زخمیوں تک پہنچنے سے قاصر ہے۔فلسطینی ٹیلی ویژن نے اطلاع دی کہ اسرائیلی بمباری کے نتیجے میں کل شام سے لے کر اب تک الاھلی عرب ہسپتال میں تقریباً 100 فلسطینی شہید ہوگئے ہیں۔اسرائیلی نشریاتی ادارے نے وزیر دفاع یوو گیلانٹ کے حوالے سے کہا کہ اسرائیلی فورسز نے غزہ شہر کے پورے مغربی حصے کا کنٹرول مکمل کر لیا ، شہر کو کنٹرول میں کرنے کا اگلا مرحلہ شروع کردیا ۔گیلانٹ کا کہنا تھا کہ الشفا ہسپتال میں اہم نتائج سامنے آئے ، افواج درست اور فیصلہ کن طریقے سے کام کر رہی ہیں ، فضائی، بحری اور زمینی افواج کے درمیان مکمل ہم آہنگی کے ساتھ آپریشن کیا جارہا ہے، اسی طرح صہیونی فورسز بھرپور انٹیلی جنس معلومات سے بھی لیس ہوکر کارروائیاں کر رہی ہیں۔اقوام متحدہ کا کہنا تھا کہ ایندھن کی کمی کی وجہ سے غزہ کی پٹی کے ساتھ رابطے مکمل طور پر منقطع ہو گئے ہیں، غزہ کی پٹی میں انٹرنیٹ اور موبائل فون سروسز معطل ہیں، مواصلاتی نظام بند ہونے کے باعث ایمبولینسزسےرابطہ کرنا بھی ممکن نہ رہا۔انروا کے کمشنر جنرل فلپ لازارینی نے جنیوا میں ایک پریس کانفرنس کے دوران بتایا کہ غزہ کی پٹی ایک بار پھر مکمل طور پر مواصلاتی تعطل کا شکار ہوگئی ہے اور یہ ایندھن کی کمی کی وجہ سے ہوا ہے۔غزہ میں ٹیلی کمیونیکیشن سروسز فراہم کرنےوالی دونوں کمپنیوں نے مواصلاتی نظام بند ہونےکی تصدیق کردی۔