لندن(اے بی این نیوز) انگلستان میں ہونےوالا سالانہ چیری فیسٹول منسوخ ، پرندوں کا چیری کے درختوں پر دھاوا، سارے پھلوں کا صفایا کرگئے ۔ آج سے شروع ہونیوالے فیسٹیول میں لوگوں کی بڑی تعداد درختوں پر لگی تازہ چیری توڑ کر کھاتے ہیں ۔ کوئل، کووں اور دیگر پرندوں نے ان سے پہلے ہی درجنوں درختوں کو خالی کردیا ۔ انگلینڈ کے علاقے کورن وال کے ایک چھوٹے سے دیہات کوٹ ہیل میں ہر سال چیری اتارنے کا مقابلہ نما میلہ منعقد کیا جاتا ہے۔ تاہم اس سال وقت سے قبل ہی کوئل، کووں اور دیگرپرندوں نے 80 سے زائد درخت صاف کردیئے جو لذیذ چیریوں سے بھرے ہوئے تھے۔یہ میلہ ہرسال پانچ روز کے لیے منعقد کیا جاتا ہے جسے نیشنل ٹرسٹ منعقد کرتا ہے۔ سال 2004 میں یہاں چیری کے درختوں پر پھل آنا شروع ہوئے جنہیں اگرانسان نہ کھائیں تو وہ ضائع ہوجاتے ہیں یا پھر پرندوں کے شکم کا حصہ بن جاتے ہیں۔فاؤنڈیشن سے وابستہ خاتون لارا جیرمن نے کہا کہ بدھ کو میلے کا افتتاح ہونا تھا جبکہ پیر کو مقامی باغبان نے بتایا کہ پرندے تمام پھل کھاچکے ہیں۔ اندازہ ہے کہ 80 سے زائد درختوں کے پھل پرندوں کے نوالےبنے ہیں۔لارا نے کہا کہ وہ خوش ہیں کہ پرندوں نے چیریاں کھائی ہیں اور اس پر کوئی تاسف بھی نہیں۔ تاہم وہ سال کے آخر میں سیب توڑ کر کھانے والے میلے کا انعقاد کریں گے۔