بلغراد(نیوزڈیسک)سربیا کے اسکول میں فائرنگ کے واقعے میں آٹھ طالبعلم اور ایک سکیورٹی گارڈ ہلاک جبکہ سات افراد زخمی ہوگئے۔غیر ملکی میڈیا کے مطابق بلغراد کے ایلیمینٹری اسکول میں 14 سالہ نوجوان کی فائرنگ کے نتیجے میں 6 طالبعلم اور ایک ٹیچر سمیت سات افراد زخمی بھی ہوئے۔ عینی شاہدین کا کہنا تھا کہ ساتویں کلاس کے 14 سالہ طالبعلم نے اپنی کلاس میں جاکر پہلے ٹیچر کو گولی ماری اور بعد میں کلاس میں موجود طالبعلموں پر گولیاں برسانا شروع کردیں۔کلاس روم سے زندہ بچ نکلنے میں کامیاب ہونے والی طالبہ نے بتایا کہ فائرنگ کرنے والا لڑکا بہت ہی خاموش اور خوش اخلاق تھا اور حال ہی میں اس نے ہمارا اسکول جوائن کیا تھا۔پولیس نے بتایاکہ فائرنگ میں ملوث ساتویں کلاس کے چودہ سالہ طالبعلم کو گرفتار کر لیا ، واقعے کے محرکات کے حوالے سے تفتیش کی جا رہی ہے۔سربیا کی وزارت داخلہ نے بتایاکہ واقعے میں زخمی ہونے والوں کو طبی امداد دی جا رہی ہے،زخمی ٹیچر کی حالت انتہائی نازک ہے ڈاکٹرز ان کی زندگی بچانے کیلئے کوششیں کر رہے ہیں جبکہ ایک طالبہ کے سر میں گولی لگی ہے جس کا آپریشن کیا جا رہا ہے۔