غزہ(اے بی این نیوز)اسرائیلی حکام نے 40 روز کی طویل بندش کے بعد مسجد الاقصیٰ کو نمازیوں کے لیے دوبارہ کھول دیا ہے۔
صبح مسجد کے دروازے کھلتے ہی نمازیوں کی بڑی تعداد نے قبلہ اول کا رخ کیا، جہاں صبح سویرے ہی رقت آمیز مناظر دیکھنے میں آئے۔
اسرائیلی حکومت کی جانب سے جاری کردہ بیان کے مطابق مقبوضہ بیت المقدس میں مسجد الاقصیٰ سمیت دیگر تمام مقدس مقامات کو آج صبح سے کھولنے کا اعلان کیا گیا۔
مسجد کھلنے کی اطلاع ملتے ہی بیت المقدس کے گلی کوچوں میں خوشی کی لہر دوڑ گئی اور شہریوں نے بڑی تعداد میں وہاں پہنچ کر عبادت شروع کر دی ہے۔
واضح رہے کہ اسرائیل نے ایران کے ساتھ حالیہ جنگ کے آغاز پر سیکیورٹی وجوہات اور کشیدگی کے پیش نظر مقبوضہ بیت المقدس میں تمام مقدس مقامات کو زائرین اور نمازیوں کے لیے بند کر دیا تھا۔
40 دن تک جاری رہنے والی یہ بندش جنگ بندی کے بعد اب ختم کر دی گئی ہے، جس سے علاقے میں مذہبی سرگرمیوں کی بحالی کی امید پیدا ہوئی ہے۔
مزید پڑھیں: ایران جنگ بندی کی کسی بھی خلاف ورزی کا فیصلہ کن جواب دیگا،ایرانی صدر
