اسلام آباد ( اے بی این نیوز )امریکی صدر ڈونلڈ ٹرمپ اور فرانسیسی صدر ایمانوئل میکرون کے درمیان جاری کشیدگی میں مزید اضافہ ہو گیا ہے۔ واشنگٹن سے جاری رپورٹ کے مطابق ٹرمپ نے میکرون کے سیاسی مستقبل پر سخت تبصرہ کرتے ہوئے کہا ہے کہ فرانسیسی صدر زیادہ عرصے تک اپنے عہدے پر برقرار نہیں رہیں گے، جس سے دونوں ممالک کے تعلقات میں تناؤ پیدا ہو گیا ہے۔
غیر ملکی خبر رساں ایجنسی کے مطابق یہ کشیدگی گرین لینڈ پر کنٹرول کے معاملے سے پیدا ہوئی ہے، جس کی وجہ سے یورپ اور امریکا کے تعلقات میں شدید رگڑ پیدا ہوئی ہے اور عالمی مالیاتی منڈیوں میں بھی ہلچل دیکھی گئی ہے۔ اس صورتحال نے یورپی ممالک میں بے چینی پیدا کر دی ہے اور ڈپلومیسی کے لیے چیلنجز بڑھا دیے ہیں۔
فرانسیسی صدر ایمانوئل میکرون نے اس معاملے پر سخت مؤقف اختیار کیا اور یورپی یونین پر زور دیا کہ وہ امریکا کے خلاف سخت تجارتی اقدامات کو فعال کرے تاکہ فرانس اور یورپ کی پوزیشن مضبوط رہے۔ انہوں نے امریکی صدر کے مجوزہ ’بورڈ آف پیس‘ میں شمولیت سے بھی ہچکچاہٹ ظاہر کی اور اقوام متحدہ کے کردار پر ممکنہ اثرات کے حوالے سے تحفظات کا اظہار کیا۔
ٹرمپ نے میکرون کے مؤقف کے بارے میں سوال پر کہا کہ “کیا انہوں نے واقعی ایسا کہا ہے؟ خیر، ویسے بھی انہیں کوئی نہیں چاہتا کیونکہ وہ بہت جلد اقتدار سے باہر ہو جائیں گے۔” انہوں نے مزید کہا کہ وہ فرانسیسی وائن اور شیمپین پر 200 فیصد اضافی ٹیرف عائد کر سکتے ہیں، جس کا مقصد فرانس کو تعاون پر مجبور کرنا ہے، تاہم ان کے بقول میکرون کی شمولیت ضروری نہیں۔
مزید پڑھیں : ماہ رمضان کا آغاز کب ہو گا،جا نئے تفصیلات
