ڈھاکہ (اے بی این نیوز) بنگلہ دیش نے امریکا کو آگاہ کیا ہے کہ وہ غزہ میں تعینات بین الاقوامی استحکامی فورس میں شمولیت کا خواہاں ہے۔بنگلہ دیش کے قومی سلامتی کے مشیر خلیل الرحمان نے واشنگٹن میں امریکی سفارت کاروں ایلیسن ہوکر اور پال کپور سے ملاقات کی۔
حکومت کے ایک بیان کے مطابق، خلیل الرحمان نے غزہ میں تعینات ہونے والی بین الاقوامی استحکامی فورس کا حصہ بننے میں بنگلہ دیش کی دلچسپی ظاہر کی، تاہم شمولیت کی نوعیت یا حدود پر تفصیلات نہیں دی گئیں۔ امریکی محکمہ خارجہ نے اس پر فوری طور پر کوئی ردعمل نہیں دیا۔
یاد رہے کہ اقوام متحدہ کی سلامتی کونسل نے نومبر 2025 میں ایک قرارداد منظور کی تھی جس کے تحت ایک عارضی استحکامی فورس قائم کرنے کا اختیار دیا گیا۔ یہ فورس غزہ میں جنگ بندی کے عمل کی نگرانی کرے گی، مگر اب تک اس جنگ بندی میں خاطر خواہ پیش رفت نہیں ہو سکی۔
غزہ کی صورتحال بدتر ہو چکی ہے، جہاں جنگ بندی کے باوجود 400 سے زائد فلسطینی اور 3 اسرائیلی فوجی ہلاک ہو چکے ہیں۔ غزہ کی 20 لاکھ سے زائد آبادی عارضی پناہ گزینی اور تباہ شدہ عمارتوں میں زندگی گزارنے پر مجبور ہے۔
اسرائیل اور حماس دونوں جنگ بندی کے اگلے مرحلے میں پیش رفت کے لیے ایک دوسرے پر معاہدے کی خلاف ورزی کے الزامات لگا رہے ہیں، اور دونوں فریقین کے درمیان سخت اقدامات پر اتفاق نہیں ہو سکا۔
اسرائیل کے حالیہ فوجی حملوں میں ہزاروں افراد ہلاک ہو چکے ہیں اور غزہ میں غذائی بحران شدید ہو گیا ہے۔ انسانی حقوق کے ماہرین اور اقوام متحدہ کی تحقیقات کے مطابق، ان حملوں کو نسل کشی کے زمرے میں شمار کیا جا رہا ہے، تاہم اسرائیل کا کہنا ہے کہ یہ اقدامات حماس کے حملوں کے ردعمل میں کیے گئے تھے، جن میں 1,200 اسرائیلی شہری ہلاک اور 250 سے زائد یرغمال بنائے گئے تھے۔
مزید پڑھیں: ورلڈکپ و آسٹریلیا کیخلاف سیریز،پاکستان کے ممکنہ کھلاڑیوں کے نام سامنے آگئے
