کینیڈا(اے بی این نیوز)کینیڈا نے 13 ممالک کیلئے ویزا فری انٹری کا اعلان کر دیا ہے۔سیاحت کے فروغ اور بین الاقوامی تعلقات کو مضبوط بنانے کیلئے کینیڈا نے 13 ممالک کے شہریوں کو ویزا فری انٹری کی سہولت دینے کا اعلان کر دیا ہے۔
اس فیصلے کے تحت متعدد کیریبین اور لاطینی امریکی ممالک کے شہری اب مخصوص شرائط پوری کرنے کی صورت میں بغیر ویزا کینیڈا کا سفر کر سکیں گے۔
کینیڈا نے اس کے ساتھ ساتھ الیکٹرانک ٹریول آتھرائزیشن (eTA) پروگرام کی سہولت بھی مزید ممالک تک بڑھا دی ہے، جس کا مقصد قلیل مدتی دوروں کے لیے داخلے کے عمل کو آسان بنانا ہے۔
نئے ویزا فری ممالک کی فہرست میں اینٹیگوا اینڈ باربوڈا، ارجنٹینا، کوسٹا ریکا، مراکش، پاناما، فلپائن، سینٹ کٹس اینڈ نیوس، سینٹ لوسیا، سینٹ ونسنٹ اینڈ دی گریناڈینز، سیشلز، تھائی لینڈ، ٹرینیڈاڈ اینڈ ٹوباگو اور یوراگوئے شامل ہیں۔
اس اقدام کو بالخصوص کیریبین ممالک کے ساتھ سفارتی تعلقات کے حوالے سے ایک مثبت پیش رفت قرار دیا جا رہا ہے کیونکہ ان میں سے پانچ ممالک اس نئی فہرست میں شامل ہیں۔
حکام کے مطابق ویزا فری داخلے کی یہ سہولت ان مسافروں کے لیے ہوگی جو ہوائی سفر کے ذریعے کینیڈا آئیں اور جنہوں نے گزشتہ 10 برسوں میں کبھی کینیڈین ویزا حاصل کیا ہو یا اس وقت ان کے پاس امریکا کا درست نان امیگرنٹ ویزا موجود ہو۔
اہل افراد بغیر علیحدہ ویزا حاصل کیے کینیڈا میں زیادہ سے زیادہ چھ ماہ تک قیام کرنے کے اہل ہوں گے، الیکٹرانک ٹریول آتھرائزیشن (eTA) دراصل ایک ڈیجیٹل اجازت نامہ ہے جو ویزا فری ممالک کے شہریوں کے لیے لازمی ہوتا ہے۔
کینیڈین حکومت کا کہنا ہے کہ اس پالیسی کا مقصد سیاحت میں اضافہ، بین الاقوامی روابط کو فروغ دینا اور کینیڈا کو عالمی مسافروں کے لیے مزید پرکشش بنانا ہے۔
مزید پڑھیں۔جی ایچ کیو حملہ کیس; 40 سے زائد غیرحاضرملزمان کے ناقابل ضمانت وارنٹ گرفتاری جاری
