یو اے ای(اے بی این نیوز )سال 2026 کے آغاز کے ساتھ ہی متحدہ عرب امارات میں متعدد نئے قوانین اور پالیسی تبدیلیاں نافذ العمل ہو گئی ہیں، جن کا مقصد عوامی سہولت، مذہبی ہم آہنگی، ماحولیاتی تحفظ اور ڈیجیٹل نظم و ضبط کو بہتر بنانا ہے۔گلف نیوز کے مطابق یکم جنوری 2026 سے امارات میں آٹھ اہم شعبوں سے متعلق نئے قوانین لاگو کر دیے گئے ہیں، جن میں تعلیم، عبادات، صحت، ماحولیات، سفر، شہری نظم، پارکنگ اور ڈیجیٹل معیشت شامل ہیں۔
تعلیم کے شعبے میں اہم فیصلے کے تحت جمعہ کے روز اسکولوں کو جلد بند کیا جائے گا تاکہ طلبہ اور تعلیمی عملہ بروقت جمعہ کی نماز ادا کر سکے۔ حکام کے مطابق اس اقدام کا مقصد تعلیمی سرگرمیوں اور مذہبی فرائض کے درمیان توازن قائم رکھنا ہے۔
اسی طرح پورے یو اے ای میں جمعہ کی نماز اور خطبے کے اوقات یکساں کر دیے گئے ہیں۔ نئے شیڈول کے مطابق جمعہ کی نماز پونے ایک بجے ادا کی جائے گی، جبکہ شہریوں کو ہدایت کی گئی ہے کہ وہ خطبہ سننے کے لیے وقت پر مساجد پہنچیں۔صحت اور ٹیکسیشن سے متعلق پالیسی میں بھی تبدیلی کی گئی ہے۔ یکم جنوری سے شوگر والے مشروبات پر عائد فلیٹ 50 فیصد ٹیکس ختم کر دیا گیا ہے اور اب ٹیکس کا اطلاق مشروبات میں شامل شوگر کی مقدار کے مطابق کیا جائے گا۔
سفری سہولیات میں بہتری کے لیے دبئی ایئرپورٹ پر ریڈ کارپٹ سروس کو مزید وسعت دے دی گئی ہے۔ جو سہولت پہلے بزنس کلاس مسافروں تک محدود تھی، اب ٹرمینل 3 پر آنے والے مسافروں کے لیے بھی متعارف کرا دی گئی ہے، جہاں اسمارٹ گیٹس کے ذریعے امیگریشن کا عمل تیزی سے مکمل کیا جا سکے گا۔
ماحولیاتی تحفظ کے تحت 2026 سے پورے ملک میں سنگل یوز پلاسٹک اشیا جیسے کپ، پلیٹیں، کٹلری، اسٹرا اور اسٹائروفوم فوڈ کنٹینرز کی تیاری، درآمد اور فروخت پر پابندی عائد کر دی گئی ہے۔ دبئی میں پلاسٹک پابندی کے آخری مرحلے کے تحت مزید اشیا کو بھی محدود کر دیا گیا ہے۔شہری سہولیات کے حوالے سے ڈسکوری گارڈنز میں پارکونک کے تحت پیڈ پارکنگ متعارف کروائی جا رہی ہے، جہاں ہر رہائشی یونٹ کو ایک مفت پارکنگ پرمٹ فراہم کیا جائے گا۔
ڈیجیٹل معیشت اور سوشل میڈیا ریگولیشن کے تحت اشتہاری مواد سے آمدن حاصل کرنے والے کونٹینٹ کریئیٹرز اور انفلوئنسرز کے لیے لازم قرار دیا گیا ہے کہ وہ 31 جنوری 2026 تک یو اے ای میڈیا کونسل سے ایڈورٹائزر لائسنس حاصل کریں۔
مزید پڑھیں :سال کا پہلا دن،افسوسناک خبر،40 افراد جا ن سے گئے،جا نئے تفصیلات
