بھارت(اے بی این نیوز)بھارتی ریاست پنجاب کے شہر موہالی میں جاری کبڈی ٹورنامنٹ کے دوران ایک دلخراش واقعہ پیش آیا، جہاں نامعلوم مسلح افراد نے سیلفی کے بہانے فائرنگ کر کے ایک کبڈی کھلاڑی کو قتل کر دیا۔
بھارتی پولیس کے مطابق مقتول کی شناخت رانا بالاچوریا کے نام سے ہوئی ہے۔ پولیس کا کہنا ہے کہ گزشتہ روز موٹر سائیکل پر سوار دو سے تین افراد کبڈی گراؤنڈ میں داخل ہوئے اور کھلاڑیوں کے قریب جا کر تصویر بنانے کا بہانہ کیا، اسی دوران انہوں نے اچانک رانا بالاچوریا پر اندھا دھند فائرنگ کر دی۔
فائرنگ کے نتیجے میں رانا بالاچوریا کے چہرے اور جسم کے اوپری حصے پر چار سے پانچ گولیاں لگیں۔ شدید زخمی حالت میں انہیں فوری طور پر اسپتال منتقل کیا گیا، تاہم وہ زخموں کی تاب نہ لاتے ہوئے دم توڑ گئے۔
پولیس کے مطابق حملہ آور سیلفی لینے کے بہانے قریب آئے اور اچانک فائرنگ شروع کر دی۔ حکام کا کہنا ہے کہ واقعے کی مختلف پہلوؤں سے تحقیقات جاری ہیں اور اس مرحلے پر کسی حتمی نتیجے پر پہنچنا قبل از وقت ہے۔
پولیس نے علاقے کو گھیرے میں لے کر شواہد اکٹھے کر لیے ہیں، جبکہ واقعے کو گینگ وار کے تناظر میں بھی دیکھا جا رہا ہے۔
دریں اثنا، بدنام زمانہ بمبیہا گینگ نے سوشل میڈیا پر جاری بیان میں اس قتل کی ذمے داری قبول کر لی ہے۔ گینگ کے مطابق رانا بالاچوریا نے پنجابی گلوکار سدھو موسے والا کے قاتلوں کو پناہ دی تھی۔ بیان میں یہ دعویٰ بھی کیا گیا ہے کہ مقتول کا تعلق مبینہ طور پر جگو بھگوان پوریا اور لارنس بشنوئی کے مخالف گروہوں سے تھا۔
مزید پڑھیں۔میکسیکو سٹی کی اسمبلی میں خواتین اراکین میں جھگڑا، بال کھینچے، تھپڑ مارے، ویڈیو وائرل
