نیویارک ( اے بی این نیوز )وائٹ ہاؤس میں امریکی صدر ڈونلڈ ٹرمپ اور ترک صدر رجب طیب اردوان کی مشترکہ پریس کانفرنس بین الاقوامی میڈیا کی توجہ کا مرکز بن گئی۔ اس موقع پر ٹرمپ نے واضح کیا کہ ان کی گفتگو میں ایف-16 اور ایف-35 طیاروں سے متعلق معاملات شامل ہوں گے اور وہ چاہتے ہیں کہ ترکیہ روس سے تیل کی خریداری ختم کرے۔ ٹرمپ نے روسی صدر ولادیمیر پیوٹن پر زور دیتے ہوئے کہا کہ اب وقت آگیا ہے کہ یوکرین کے خلاف جنگ بندی کا اعلان کیا جائے،
کیونکہ روس کی طرف سے جاری ہنگامہ آرائی خطے اور دنیا کے امن کے لیے سنگین خطرہ بنتی جارہی ہے۔ٹرمپ نے صدر اردوان کو انتہائی قابل احترام شخصیت قرار دیا اور کہا کہ امریکا ترکیہ کے ساتھ بڑے تجارتی معاہدوں پر دستخط کرنے کے لیے تیار ہے۔ ان کا کہنا تھا کہ یہ شراکت داری نہ صرف اقتصادی تعلقات کو مضبوط کرے گی بلکہ دفاعی شعبے میں بھی نئے مواقع پیدا کرے گی۔
ترک صدر اردوان نے بھی ہتھیاروں کے متعدد معاہدوں پر بات چیت کی تصدیق کی اور کہا کہ یہ شراکت داری دونوں ممالک کے مفاد میں ہے۔ٹرمپ نے ایک بار پھر روس کو خبردار کیا کہ اگر یوکرین کے خلاف جنگ بند نہ کی گئی تو ترکی روسی تیل کی درآمد روکنے پر مجبور ہو جائے گا۔ پریس کانفرنس کے دوران ان کے بیانات نے واضح کیا کہ امریکا خطے میں روس کے بڑھتے ہوئے اثرورسوخ کو روکنے کے لیے ترکی کو کلیدی شراکت دار کے طور پر دیکھ رہا ہے۔
