واشنگٹن (اے بی این نیوز) امریکی صدر ڈونلڈ ٹرمپ نے بھارتی وزیرِاعظم نریندر مودی کو اُن کی 75ویں سالگرہ پر فون کرکے مبارکباد دی۔ یہ دونوں رہنماؤں کے درمیان جون 2025 کے بعد پہلا براہِ راست رابطہ تھا، جس نے پاک بھارت جنگ کے تناظر میں سفارتی حلقوں میں نئی بحث چھیڑ دی ہے۔

وائٹ ہاؤس اور بھارتی وزارتِ خارجہ کے مطابق فون کال کے دوران صدر ٹرمپ نے نریندر مودی کی قیادت کو سراہتے ہوئے کہا کہ وہ بھارت میں شاندار کام کر رہے ہیں۔ امریکی صدر نے اس اُمید کا اظہار کیا کہ آئندہ دنوں میں امریکا اور بھارت اپنے تجارتی تعلقات کو مزید وسعت دیں گے اور انہیں نئی بلندیوں تک لے جائیں گے۔

ڈونلڈ ٹرمپ نے کہا کہ امریکا خطے میں بھارت کے ساتھ شراکت داری کو اہمیت دیتا ہے اور مستقبل قریب میں دونوں ممالک کے درمیان اقتصادی تعاون کے نئے دروازے کھلیں گے۔اس موقع پر بھارتی وزیرِاعظم نریندر مودی نے امریکی صدر کا شکریہ ادا کرتے ہوئے کہا کہ بھارت امریکا کے ساتھ تعلقات کو مزید مستحکم کرنے کے لیے پرعزم ہے۔ ان کا کہنا تھا کہ دونوں ملک نہ صرف تجارت بلکہ ٹیکنالوجی، سلامتی اور عالمی چیلنجز سے نمٹنے کے لیے بھی مل کر کردار ادا کر سکتے ہیں۔

مزید پڑھیں :امریکی وزیر خارجہ مارکو روبیو کی اہلیہ بال بال بچ گئی،ویڈیو وائرل