ڈھاکہ (اے بی این نیوز)بنگلہ دیش میں عبوری حکومت کے سربراہ اور نوبیل امن انعام یافتہ محمد یونس نے کہا ہے کہ ملک میں آئندہ عام انتخابات فروری 2026 میں ہونگے ۔

غیر ملکی خبر رساں ادارے رائٹرز کے مطابق سابق بنگلادیشی وزیراعظم شیخ حسینہ واجد کی معزولی کا ایک سال مکمل ہونے پر محمد یونس نے قوم سے خطاب کرتے ہوئے کہا کہ عبوری حکومت کی جانب سے میں چیف الیکشن کمشنر کو ایک خط لکھوں گا، جس میں درخواست کی جائیگی کہ انتخابات رمضان سے پہلے فروری 2026 میں کرائے جائیں۔

محمد یونس نے 5 اگست کو ایک ٹیلیویژن خطاب میں کہا کہ اب وقت آ چکا ہے کہ ہم اپنی آخری ذمہ داری کو مکمل کریں، یعنی قومی انتخابات۔ اس تاریخی دن، آپ کے سامنے یہ تقریر مکمل کرنے کے بعد ہم اپنے دور حکومت کا سب سے اہم اور آخری باب شروع کرینگے۔ اب ہم منتخب حکومت کے حوالے کرنے کا عمل شروع کرینگے۔

انہوں نے مزید کہا کہ انتخابات میں خواتین کی بڑی تعداد میں ووٹ ڈالنے کی توقع ہے اور اس کے لئے تمام ضروری اقدامات کیے جائیں گے۔ہم چاہتے ہیں کہ اس انتخابات میں خواتین سمیت نئے ووٹرز کو بھرپور طریقے سے ووٹنگ کا موقع ملے اور گزشتہ 15 سالوں کے دوران جو لوگ ووٹ نہیں ڈال سکے، وہ اس بار اپنے حق کا استعمال کریں۔

عبوری حکومت کے سربراہ نے اس بات پر بھی زور دیا کہ بنگلہ دیش میں مستقبل میں کسی بھی حکومت کو فاشزم میں تبدیل ہونے سے بچانے کے لیے ریاستی ڈھانچے کی دوبارہ تعمیر ضروری ہے۔ ہمیں ایسا نظام بنانا ہوگا جس میں فاشزم کے آثار کو فوراً جڑ سے اکھاڑ دیا جائے تاکہ ہمیں مزید 16 سال انتظار نہ کرنا پڑے اور نہ ہی لوگوں کو اپنی جانوں کی قربانی دینی پڑے۔
مزید پڑھیں: پاکستان کے مختلف شہروں میں آج بروزبدھ06 اگست 2025 موسم کی تازہ ترین صورتحال