میکسیکو (اے بی این نیوز) میکسیکو کی ریاست تماولیپاس میں پانچ موسیقاروں کو قتل کر دیا گیا ہے، جن کے بارے میں شبہ ہے کہ انہیں منشیات فروش گروہ نے نشانہ بنایا۔ یہ واقعہ امریکی سرحد کے قریب واقع شہر رینوسا میں پیش آیا۔
بی بی سی کے مطابق تاماولیپاس کے اٹارنی جنرل اروِنگ بریوس کا کہنا ہے کہ مقتولین کا تعلق گروپو فیوگیٹیوو نامی بینڈ سے تھا، جو 25 مئی کو ایک نجی تقریب میں شرکت کے لئے جا رہے تھے کہ راستے میں لاپتہ ہو گئے۔
کچھ ہی دیر بعد ان کے اہل خانہ کو تاوان کی کالز موصول ہوئیں۔ پولیس نے گلف کارٹیل کے نو مبینہ ارکان کو گرفتار کر لیا ہے جن پر قتل کا شبہ ہے۔ گرفتاری کے دوران نو ہتھیار اور دو گاڑیاں بھی قبضے میں لی گئیں۔یہ موسیقار 20 سے 40 سال کی عمر کے تھے اور مقامی تقریبات اور رقص کی محفلوں میں پرفارم کیا کرتے تھے۔
انکا بینڈ علاقائی میکسیکن موسیقی بجایا کرتا تھا، جس میں بعض اوقات کارٹیلز کے حق میں گیت بھی شامل ہوتے تھے ، تاہم ابھی یہ واضح نہیں کہ انکے قتل کی وجہ موسیقی تھی یا وہ ریاست میں جاری پرتشدد حالات کی زد میں آ گئے۔
رینوسا اور اس کے آس پاس کے علاقے گلف کارٹیل کے زیر اثر ہیں اور یہاں اکثر مسلح جھڑپیں ہوتی ہیں۔ امریکی حکومت نے اس گروہ کو عالمی دہشتگرد تنظیم قرار دے رکھا ہے۔ جنوری میں امریکہ نے رینوسا سمیت متعدد میکسیکن شہروں کے لیے اپنے شہریوں کو سفر نہ کرنے کی وارننگ جاری کی تھی۔ ان علاقوں میں قانون نافذ کرنے والے اداروں کی رسائی محدود ہے اور جرائم پیشہ گروہ کھلے عام گشت کرتے ہیں۔
مزید پڑھیں: پاکستان کے مختلف شہروں میں آج بروزہفتہ 31مئی 2025سونے کی تازہ ترین قیمت
