اسلام آباد ( اے بی این نیوز )1917 کے بعد پہلی بار امریکہ کی معیشت کو بڑا جھٹکا لگا ہے۔ عالمی ریٹنگ ایجنسی موڈیز نے امریکہ کی قرضوں سے متعلق ریٹنگ AAA سے کم کر کے Aa1 کر دی ہے۔ اس سے پہلے موڈیز واحد ایجنسی تھی جس نے امریکہ کی مکمل کریڈٹ ریٹنگ برقرار رکھی ہوئی تھی، لیکن اب وہ بھی فِچ اور ایس اینڈ پی کے ساتھ شامل ہو گئی ہے، جنہوں نے پہلے ہی امریکی ریٹنگ کم کر دی تھی۔
موڈیز کا کہنا ہے کہ گزشتہ کئی برسوں سے امریکہ کے قرض اور سود کی ادائیگی میں تیزی سے اضافہ ہو رہا ہے، اور مستقبل میں بھی قرض لینے کی ضرورت بڑھتی جائے گی، جو ملک کی معیشت پر دباؤ ڈالے گا۔
اس فیصلے سے مالیاتی منڈیوں میں ہلچل مچ سکتی ہے، شرح سود بڑھنے کا امکان ہے اور امریکی عوام پر مزید مالی بوجھ پڑ سکتا ہے۔ وائٹ ہاؤس کے ترجمان نے اس پر ردعمل دیتے ہوئے کہا کہ بائیڈن حکومت ٹرمپ دور کی مالی خرابیوں کو ٹھیک کرنے پر کام کر رہی ہے، اور موڈیز کو ماضی کی غلط پالیسیوں پر بھی بولنا چاہیے تھا۔
