ریاض (اے بی این نیوز)سعودی عرب نے اپنی معیشت کو متنوع بنانےکیلئے ایک نیا اقدام اٹھاتے ہوئے ملک بھر میں ریئل اسٹیٹ ٹرانزیکشن ٹیکس نافذ کر دیا ہے، جس کی شرح 5 فیصد ہے۔
زکٰوۃ، ٹیکس اور کسٹمز اتھارٹی (ZATCA) کے مطابق یہ نیا ٹیکس تمام اقسام کی جائیدادوں پر لاگو ہوگا، جن میں رہائشی، تجارتی، اور صنعتی املاک شامل ہیں یہ ٹیکس جائیداد کی نوعیت، استعمال، ترقی کی حالت یا مکمل یا جزوی ملکیت کی منتقلی سے قطع نظر نافذ العمل ہوگا۔ حتیٰ کہ غیر دستاویزی لین دین پر بھی اس کا اطلاق ہوگا۔
اس نئے ضابطے پر عمل درآمد کے لیے تمام جائیدادوں کی منتقلی کو ZATCA کی ویب سائٹ پر موجود RETT پلیٹ فارم کے ذریعے رجسٹر کرنا لازم ہوگا، لین دین میں شامل تمام فریقوں کو جائیداد کی تفصیلات اور کسی بھی ممکنہ استثنا کو نوٹری یا قانونی اتھارٹی کے سامنے ظاہر کرنا ہوگا۔
ZATCA نے اپنے آفیشل ”ایکس“ اکاؤنٹ پر کہا ہے کہ یہ نیا ٹیکس ضابطہ جائیداد کے شعبے میں ایک واضح قانونی فریم ورک قائم کرنے، سرمایہ کاری کو فروغ دینے، اور سماجی و معاشی اہداف کے لیے ٹیکس استثنا کو بہتر بنانے کے لیے متعارف کروایا گیا ہے۔
مزید پڑھیں: خیبرپختونخوا،نوشہرہ میں ایکسائز کی گاڑی پر فائرنگ،2 اہلکار شہید ،ایک زخمی
