اسلام آباد ( اے بی این نیوز )سعودی عرب میں 3 اپریل سے 9 اپریل 2025 کے دوران 18,669 غیر قانونی تارکین وطن کو گرفتار کیا گیا۔
سعودی خبر رساں ادارے کے مطابق غیر قانونی تارکین کے خلاف کارروائی کرنے والی مشترکہ کمیٹی نے بتایا کہ گرفتار شدگان میں سے 11,813 افراد اقامہ قوانین، 4,366 سرحدی قوانین اور 2,490 لیبر قوانین کی خلاف ورزی کر رہے تھے۔
اسی عرصے میں سعودی عرب میں غیر قانونی طور پر داخل ہونے کی کوشش کرنے والے 1,497 افراد کو بھی گرفتار کیا گیا، جن میں 27 فیصد کا تعلق یمن، 69 فیصد ایتھوپیا اور 4 فیصد دیگر ممالک سے تھا۔ ملک سے غیر قانونی طور پر باہر جانے کی کوشش کرنے والے 59 افراد بھی پکڑے گئے۔
مزید 17 افراد کو غیر قانونی تارکین کو سہولت فراہم کرنے پر حراست میں لیا گیا۔ وزارت داخلہ کے مطابق غیر قانونی تارکین کو کسی قسم کی مدد فراہم کرنا سنگین جرم ہے، جس پر 15 سال قید اور 10 لاکھ ریال جرمانہ عائد ہو سکتا ہے۔
