اسٹراسبرگ(نیوزڈیسک)یورپ بھر میں اب 10 ہزار یورو سے زائد نقد ادائیگی نہیں کی جا سکے گی۔غیرملکی خبررساں ادارے کے مطابق یہ بات یورپین پارلیمنٹ کے اسٹراسبرگ میں جاری اجلاس کے دوران بتائی گئی، اس حوالے سے یورپین پارلیمنٹ اور یورپین کونسل کے درمیان منی لانڈرنگ اور دہشت گردوں کی مالی معاونت کی روک تھام کیلئے یورپ بھر میں ایک ہی جیسے قوانین وضع کرنے اور ایک ہی رولز بک پر عمل کرنے کے حوالے سے معاہدے پر اتفاق ہوگیا۔معاہدے کے مطابق یورپ بھر میں منی لانڈرنگ اور دہشت گردوں کی مالی معاونت کیلئے نگرانی اور پابندیوں کے یکساں قواعد ہوں گے۔فنانشل انٹیلیجنس یونٹس کو زیادہ با اختیار بنایا جائے گا جس کے تحت انہیں مشکوک رقوم کے مالکان کے بارے میں معلومات تک رسائی حاصل ہوگی۔جبکہ پروفیشنل فٹبال کلبوں پر بھی 2029 سے شفافیت کے قوانین لاگو ہوں گے جس کے تحت وہ اپنے صارفین کی شناخت کی تصدیق کرنے، لین دین کی نگرانی کرنے اور متعلقہ فنانشل انٹیلیجنس یونٹ کو کسی بھی مشکوک لین دین کی اطلاع دینے کے پابند ہوں گے۔علاوہ ازیں یورپ بھر میں نقد رقم کے لین دین پر 10 ہزار یورو کی حد نافذ ہوگی۔