اسلام آباد(نیوزڈیسک ) برطانیہ کے طول و عرض میں شدید برفباری کے باعث زندگی متاثر، سکول بند کردیے گئے ہیں اور لوگ گھروں میں محصور ہوکر رہ گئے ہیں،اسکاٹ لینڈ اور مرسیسائڈ میں 100 سے زیادہ اسکول بند کیے گئے ہیں، موسم کی شدت کے باعث لوگوںکیلئے گھروں سے نکلنا محال ہوگیا ہے،صنعتی اور تجارتی سرگرمیاں بھی شدید متاثر ہوئی ہیں، دفاتر میں حاضری خاصی کم ، شمال سے چلنے والی سرد ہوائوں نے ملک کے بیشتر حصے کو لپیٹ میں لے رکھا ہے،بہت سے علاقوں نے برف کی چادر اوڑھ لی ہے، سینکڑوں گاڑیاں برف میں پھنس گئیں، امدادی اداروں کو متحرک کردیا گیا ہے۔ حکومت نے غیر ضروری طور پر گھر سے نکلنے سےمنع کیا ہے،ملک بھر میں درجہ حرارت تیزی سے گرا ہے جس کے نتیجے میں انجماد کی حالت نے لوگوں کو جکڑلیا ہے،برطانیہ میں ہر سال 24 دن برفباری ہوتی ہے، زیادہ برف باری بلند میدانی علاقوں میں ہوتی ہے جہاں درجہ حرارت خاصا کم ہوتا ہے۔