مقبوضہ غزہ(نیوزڈیسک) غزہ میڈیا آفس نے بتایا کہ 7 اکتوبر کے بعد سے اب تک اسرائیلی فوج غزہ سے لاکھوں ڈالر کی نقدی اور سونا چوری کرچکی ہے۔ درجنوں شہریوں نے شکایات کی ہیں کہ اسرائیلی فوج نے ان کے پیسے اور سونا چرایا ہے، چوری کی گئی نقدی اور سونے کے زیورات کی مالیت 25 ملین ڈالرسے زائد ہے۔ چوری کی وارداتیں مختلف طریقوں سے انجام دی گئیں، چیک پوسٹوں پر نقل مکانی کرنے والے افراد کے سامان کی تلاشی کے دوران ان کی نقدی اور زیورات چرائے گئے۔اس کے علاوہ اسرائیلی فوج نے غزہ کے خالی کیے گئے گھروں پر بھی دھاوا بولا اور وہاں لوٹ مار کی، اس دوران بعض صیہونی فوجیوں نے تصاویر اور ویڈیوز بھی بنوائیں جنہیں سوشل میڈیا پر بھی اپلوڈ کیا گیا۔ادھراپنی ایک رپورٹ میں اسرائیلی اخبار نے بھی صیہونی فوجیوں کی لوٹ مارکو غزہ میں منظم چوری کا نام دیا۔