دبئی(نیوزڈیسک)بھارت کیساتھ دفاعی معاہدوں کے بعد یواے ای کا 45 رکنی فوجی دستہ پندرہ روزہ مشترکہ مشقوں کیلئے بھارت پہنچ گیا۔ 2017 کے جامع دفاعی معاہدے کے بعد یہ دونوں ملکوں کی بری افواج کی پہلی مشترکہ مشقیں ہیں۔بھارتی وزارتِ دفاع کے مطابق مشترکہ مشقوں کا بنیادی مقصد امن قائم کرنے کے عالمی مشنزکیلئے مل کر کام کرنے کی صلاحیت کو پروان چڑھانا ہے۔ اماراتی فوجی دستے کا تعلق زاید فرسٹ بریگیڈ سے ہے۔بھارت اور متحدہ عرب امارات کی مشترکہ فوجی مشقوں کو ”ڈیزرٹ سائیکلون“ کا نام دیا گیا۔مشترکہ مشقوں میں حصہ لینے والے بھارتی فوجیوں کا تعلق میکینائزڈ انفینٹری رجمنٹ کی ایک بٹالین سے ہے۔دو ہفتوں کی یہ مشقیں پاکستان سے ملحق مغربی ریاست راجستھان کے علاقے مہاجن میں ہو رہی ہیں اور 15 جنوری کو مکمل ہوں گی۔ بھارتی سفیر سنجے سدھیر نے عرب نیوز کو بتایا کہ اب تک بھارت اور یو اے ای کی بحریہ اور فضائیہ نے مشترکہ مشقیں کی۔ اب بڑی افواج کے درمیان بھی اشتراکِ عمل ہو رہا ہے۔بھارتی سفیر نے مزید کہا کہ خلیجِ فارس کے خطے میں یو اے ای چند برسوں میں بھارت کا بڑا تجارتی اور اسٹریٹجک پارٹنر بن کر ابھرا ہے۔ اس دوستی سے خطے کے دیگر ممالک کو بھی بھارت سے قریب اور ہم آہنگ ہونے کی تحریک مل رہی ہے۔