غز ہ (نیوزڈیسک)اسرائیلی فوج کی سفاکانہ کارروائیاں جاری، خان یونس شہر میں زمینی کارروائی کے دوران متعدد عمارتیں تباہ کردیں،عالمی تنقید کے باوجود اسرائیل کی غزہ پر جارحیت جاری متعدد فلسطینی شہید کئی افراد زخمی ہیں۔عالمی میڈیا رپورٹس کے مطابق اسرائیلی فوج نے دعویٰ کیا کہ عمارتوں میں حماس کے درجنوں کارکن رہائش پذیر تھے، ان عمارتوں میں حماس کی آپریشنل سرگرمیاں جاری تھیں۔میڈیا رپورٹس کے مطابق اسرائیل نے رفح سمیت دیگر مقامات پربھی حملے کئے، اسرائیلی وزیر دفاع کا کہنا ہے کہ اہداف کے حصول تک غزہ میں فوجی آپریشن جاری رہے گا۔ حماس کی جانب سے بھی اسرائیل کے خلاف جوابی کارروائی جاری ہے، غزہ میں اسرائیلی فوجیوں کے خلاف کارروائی کرتے ہوئے حماس نے متعدد اسرائیلی ٹینکوں اور بکتر بند گاڑیوں کو تباہ کردیا۔دوسری جانب اقوام متحدہ کے سربراہ نے ایک بار پھر فوری انسانی بنیادوں پر جنگ بندی کا مطالبہ کیا اور خبردار کیا کہ تنازع کے پھیلاؤ سے پورے خطے کے لیے تباہ کن نتائج ہوں گے۔ادھر عالمی ادارہ صحت نے غزہ میں بیماریاں پھیلنے کا خدشہ ظاہر کیا ہے۔