اسلام آباد (نیوزڈیسک) پاکستان تحریک انصاف کی جانب سے سپریم کورٹ میں الیکشن کمیشن کیخلاف توہین عدالت کی درخواست دائر۔ لیول پلیئنگ فیلڈ فراہمی کے فیصلے پر عملدرآمد نہ ہونے پر الیکشن کمیشن کیخلاف توہین عدالت کی درخواست دائر کی گئی ۔ چاروں چیف سیکرٹریز، آئی جیز، سیکرٹری داخلہ، سیکرٹری الیکشن کمیشن کو فریق بنایا گیا۔پی ٹی آئی کی جانب سےدرخواست میں موقف اختیار کیا گیا ہے کہ سیکرٹری الیکشن کمیشن نے 22 دسمبر کے حکم کے باوجود پی ٹی آئی کی شکایات کا ازالہ نہیں کیا۔ تحریک انصاف نے موقف اختیار کیا کہ سپریم کورٹ کے واضح احکامات کے باوجود پی ٹی آئی امیدواروں کو ہراساں اور گرفتار کیا گیا۔پی ٹی آئی کا درخواست میں کہنا ہے کہ الیکشن کمیشن پنجاب نے الیکشن کمیشن کو پی ٹی آئی امیدواروں سے ہونے والے سلوک سے بذریعہ خط آگاہ کیا۔درخواست میں کہا گیا کہ آئی جی پنجاب پی ٹی آئی کیخلاف ہونے والی کارروائیوں کے ماسٹرمائنڈ ہیں، الیکشن کمیشن کے خلاف سپریم کورٹ کے فیصلے پر عمل نہ کرنے پر توہین عدالت کارروائی کی جائے۔درخواست میں یہ بھی استدعا کی گئی کہ عدالتی حکم عدولی کرنے والوں کیخلاف سخت کارروائی کی جائے، پی ٹی آئی نے درخواست میں اپنے امیدواروں کو ریلیوں اور جلسوں کی اجازت دینے کی بھی استدعا کی۔
