اسلام آباد(نیوزڈیسک) فوجی عدالتوں میں سویلینز کے ٹرائل معاملے پر وفاقی حکومت کی جانب سے سپریم کورٹ فیصلے کیخلاف اپیل پر سپریم کورٹ نے فیصلہ سنادیا ۔ وفاقی حکومت کی جانب سے عدالت عظمیٰ میں دائر کی گئی اپیل میں فوجی عدالتوں سے متعلق حکم کو کالعدم قرار دینے اور اپیلوں کی سماعت کے دوران عدالتی حکم کو معطل کرنے کی استدعا کی گئی تھی ۔سپریم کورٹ نے سویلین کے ٹرائل سے متعلق پانچ رکنی بینچ کا فیصلہ معطل کردیا۔ حکومت کی جانب سے اپیل میں مؤقف اختیار کیا گیا کہ درخواست گزاروں کی جانب سے آرمی ایکٹ کے سیکشن 2(1) ڈی اور سیکشن 59(4) کو چیلنج کیا گیا تھا ۔ کیس میں اصل تنازع سپریم کورٹ کے فیصلے میں حقائق اور آرٹیکل 199 کے تحت دستیاب فورم کو مد نظر نہ رکھنا ہے۔درخواست کے مطابق سویلین کی تعریف میں تمام شہری آتے ہیں، چاہے وہ دہشت گرد ہوں یا دشمن۔سپریم کورٹ کی جانب سے 2(1) ڈی اور 59(4) کو کالعدم کرنے سے نان یونیفارم شہریوں کے حوالے سے قانون ختم ہو گیا ۔ وفاقی حکومت کو تمام درخواستوں میں فریق بنایا گیا تھا ۔