جدہ (اے بی این نیوز) سعود ی وزارت مذہبی امور نے خانہ کعبہ کا غلاف نئے اسلامی سال کے آغاز میں یکم محرم کو تبدیل کرنے کا اعلان کردیا، تبدیلی کیلئے تیاریوں کا آغاز کردیا گیا۔غلافِ کعبہ بنانے والی الکسوہ فیکٹری کی انتظامیہ کے مطابق کعبے کیغلاف کی تبدیلی کیلئے 15 افراد کو فنی تربیت فراہم کی گئی ہے۔ مکہ مکرمہ میں غلافِ خانہ کعبہ یکم محرم کو تبدیل کیا جائے گا۔غلافِ کعبہ میں 670 کلو ریشم استعمال کیا گیا جبکہ 120 کلوگرام سونا اور 100 کلوگرام چاندی کا بھی استعمال کیا گیا ۔یاد رہے کہ گزشتہ سال تاریخ میں پہلی بار یکم محرم الحرام کو غلاف کعبہ تبدیل کیا گیا تھا۔ سعودی عرب میں غلاف کعبہ کی تبدیلی کی روح پرور تقریب منعقد کی گئی تھی۔ سعودی عرب کی تاریخ میں یہ پہلا موقع تھا جب غلاف کعبہ کی تبدیلی یکم محرم کو کی گئی تھی۔غلافِ کعبہ جسے کسوۃ کہا جاتا ہے، دنیا کا مہنگا ترین غلاف ہے۔ اس کی تیاری کی لاگت 65 لاکھ ڈالرز ہے۔