اسلام آباد(اے بی این نیوز) وزیر اعظم شہباز شریف نے ورلڈکپ کیلئے قومی ٹیم کے بھارت جانے یا نہ جانے کا فیصلہ کرنے کیلئے اعلیٰ سطح کی وزارتی کمیٹی قائم کردی جس کی رپورٹ پر حتمی فیصلے کی منظوری وزیر اعظم شہباز شریف عسکری قیادت کے ساتھ مشاورت کے بعد کرینگے ۔بھارت میں قومی ٹیم کی روانگی کے فیصلے کو عسکری قیادت کی آمادگی کے ساتھ مشروط کیا گیا ہے جسکی وجہ سے وزارتی کمیٹی میں عسکری قیادت کے نمائندے اور قومی سلامتی کے اداروں کے حکام کو بھی شامل کیا گیا ہے ۔کمیٹی ورلڈ کپ میں پاکستان کی شرکت سے متعلق فیصلہ کرے گی ۔ اعلی سطحی کمیٹی کا سربراہ وزیر اعظم نے وزیرِ خارجہ بلاول بھٹو زرداری کو بنایا ہے کمیٹی میں وفاقی وزرا رانا ثنا اللہ، اعظم نذیر تارڑ، احسان مزاری، مریم اورنگزیب، اسعد محمود، امین الحق، قمر زمان کائرہ اور طارق فاطمی بھی شامل ہیں۔ قومی سلامتی کے اداروں کے سربراہ اور سیکرٹری خارجہ بھی کمیٹی میں شامل ہیں ویسٹ انڈیز کے بعد زمبابوے بھی ورلڈکپ 2023 کیلئے کوالیفائی نہ کرسکا حکومتی ذرائع کے مطابق کمیٹی بھارت میں ورلڈ کپ سے متعلق تمام امور پر سفارشارت مرتب کرے گی جن کی روشنی میں ورلڈ کپ میں شرکت کا فیصلہ کیا جائے گا۔اس حوالے سے ذرائع کا کہنا ہے کہ حتمی سفارشات منظوری کے لیے وزیراعظم کو بھجوائی جائیں گی۔واضح رہے کہ پاکستان کرکٹ بورڈ نے قومی ٹیم کی ورلڈ کپ میں شرکت حکومتی اجازت سےمشروط کر رکھی ہے۔یاد رہے کہ ورلڈ کپ میں پاکستان اور بھارت کے درمیان میچ 15 اکتوبر کو احمد آباد میں شیڈول ہے۔