اسلام آباد(اے بی این نیوز) بورڈ آف ایگزیکٹو ڈائریکٹر ورلڈ بینک نےخیبرپختونخوا سٹیزن سینٹرڈ ڈلیوری پروجیکٹ اور ضم شدہ اضلاع میں انتظامی سہولت کے مراکز کیلئے 4 کروڑ 60 لاکھ ڈالر قرض دینے کی منظوری دیدی۔ عالمی بینک مشن نے اعلان کیا کہ خیبرپختونخوا میں دو سال کی عمر کے تقریباً تین لاکھ بچے چائلڈ ویلفیئر گرانٹس سے مستفید ہونگے، مالی رکاوٹوں کو کم کرنے کیلئے بچوں کے خاندانوں کو ان کی صحت سے متعلق آگاہی سیشن میں شرکت اور ان کی نشوونما کی نگرانی کیلئے 12 ہزار 500 روپے ملیں گے۔ کنٹری ڈائریکٹر ناجی بنہاسین کا کہنا تھا کہ یہ پراجیکٹ بچوں کی نشوونما کے گرانٹس کو بڑھانے کیلئے حکومت کی معاونت کریگا جو کہ ماں پر مشتمل ہوگا۔
