لاہور(نیوز ڈیسک) پاکستان تحریک انصاف کے چیئرمین عمران خان نے کہا کہ سندھ کے لوگ امپورٹڈ حکومت اور زرداری مافیا سے نجات چاہتے ہیں، پی ٹی آئی سندھ کی قیادت زرداری مافیا کے خلاف جہاد کررہی ہے، ووٹ کی طاقت سے سندھ میں زرداری مافیا کو شکست دیں گے، تحریک انصاف سے سندھ کے عوام کی امیدیں وابستہ ہیں۔ جیل بھرو تحریک نے ملک میں انقلاب کا آغاز ہے۔ انہوں نے سابق وفاقی وزیر علی زیدی کو عام انتخابات کی تیاری اور سندھ کے لئے پارلیمانی بورڈ تشکیل دینے کی ہدایت کردی، عمران خان نے جلد سندھ کے تمام اضلاع کے دورے کرنے کا اعلان کردیا۔تفصیلات کے مطابق پاکستان تحریک انصاف کے چیئرمین سابق وزیراعظم عمران خان سے پی ٹی آئی سندھ کے صدر و سابق وفاقی وزیر علی زیدی کی وفد کے ہمراہ زمان پارک لاہور میں ملاقات ہوئی جن کے ہمراہ سابق وزرائےاعلیٰ سندھ غوث علی شاہ، لیاقت جتوئی، پی ٹی آئی رہنما شیر محمد رند، آغا ارسلان اور دیگر بھی ملاقات میں موجود تھے،ملاقات میں سندھ کی سیاسی صورتحال پر تبادلہ خیال کیا گیا۔اس موقع پر عمران خان نے لیاقت جتوئی اور غوث علی شاہ کو سینٹرل ایگزیکٹو کمیٹی کا ممبر بنانے کا فیصلہ کیا اور صوبائی صدر علی زیدی کو عام انتخابات کی تیاریوں کی ہدایت دی۔چیئرمین پی ٹی آئی عمران خان نے علی زیدی کو سندھ کے لئے پارلیمانی بورڈ تشکیل دینے کی بھی ہدایت کردی۔عمران خان نے جلد سندھ کے تمام اضلاع کے دورے کرنے کا بھی اعلان کیا۔
