مظفرآباد: آزاد کشمیر کی سیاست میں اہم پیش رفت ہوئی ہے، جہاں بیرسٹر افتخار گیلانی نے آزاد کشمیر کے 17ویں وزیراعظم کی حیثیت سے اپنے عہدے کا حلف اٹھا لیا۔ ایوان صدر مظفرآباد میں ہونے والی تقریب میں قائم مقام صدر آزاد کشمیر چوہدری طارق فاروق نے نومنتخب وزیراعظم سے حلف لیا۔
وزارت عظمیٰ کے انتخاب کے لیے آزاد کشمیر قانون ساز اسمبلی کا اجلاس ہوا، جس میں بیرسٹر افتخار گیلانی نے واضح اکثریت حاصل کی۔ انہیں 30 ارکان نے ووٹ دیا، جبکہ پاکستان پیپلز پارٹی کے امیدوار سردار مختار احمد عباسی کے حصے میں 14 ووٹ آئے۔ انتخاب میں مجموعی طور پر 44 ووٹ ڈالے گئے، جبکہ اسمبلی کے دو ارکان نے ووٹنگ میں حصہ نہیں لیا۔
بیرسٹر افتخار گیلانی مسلم لیگ ن کے ٹکٹ پر ٹیکنوکریٹ نشست سے آزاد کشمیر قانون ساز اسمبلی کے رکن منتخب ہوئے تھے۔ وہ اس سے قبل آزاد کشمیر میں وزیر تعلیم کی ذمہ داریاں بھی انجام دے چکے ہیں۔
ان کا سیاسی سفر بھی طویل ہے۔ وہ پہلی مرتبہ 2011 میں آزاد کشمیر قانون ساز اسمبلی کے رکن منتخب ہوئے تھے۔ وزارت عظمیٰ کے انتخاب میں کامیابی کے بعد مسلم لیگ ن ایک طویل وقفے کے بعد آزاد کشمیر میں دوبارہ حکومت بنانے کی پوزیشن میں آگئی ہے۔
حلف برداری کی تقریب کے لیے ایوان صدر مظفرآباد میں خصوصی انتظامات کیے گئے تھے۔ تقریب میں مختلف سیاسی و سماجی شخصیات سمیت بڑی تعداد میں مہمانوں کی شرکت متوقع تھی، جبکہ تقریب کے لیے تقریباً 300 مہمانوں کو دعوتی کارڈ جاری کیے گئے۔
حلف اٹھانے کے بعد بیرسٹر افتخار گیلانی نے آزاد کشمیر کے انتظامی امور باضابطہ طور پر سنبھال لیے ہیں۔ ان کی حکومت کو اب خطے کے انتظامی، سیاسی اور عوامی معاملات پر توجہ دینا ہوگی۔
