اسلام آباد: این ڈی ایم اے سیلاب الرٹ کے تحت ملک کے شمالی علاقوں میں ممکنہ سیلابی صورتحال کے پیش نظر شہریوں اور متعلقہ اداروں کو احتیاطی تدابیر اختیار کرنے کی ہدایت جاری کر دی گئی ہے۔
نیشنل ڈیزاسٹر مینجمنٹ اتھارٹی (این ڈی ایم اے) کے مطابق 20 سے 25 جولائی کے دوران گلگت بلتستان، آزاد کشمیر اور خیبر پختونخوا کے مختلف علاقوں میں درجہ حرارت میں اضافے اور مسلسل بارشوں کے باعث گلیشیئر تیزی سے پگھل سکتے ہیں۔ اس صورتحال کے نتیجے میں دریاؤں، ندی نالوں اور برساتی گزرگاہوں میں پانی کی سطح خطرناک حد تک بلند ہونے کا امکان ظاہر کیا گیا ہے۔
ادارے کے مطابق گلیشیائی جھیلوں پر بڑھتے ہوئے دباؤ کے باعث بعض مقامات پر گلیشیئر پھٹنے کا خدشہ بھی موجود ہے، جس سے اچانک آنے والے سیلاب کا خطرہ بڑھ سکتا ہے۔
این ڈی ایم اے نے خبردار کیا ہے کہ ہنزہ، نگر، غذر، اسکردو، شگر، غانچے، استور اور دیامر سمیت متعدد اضلاع حساس قرار دیے گئے ہیں۔ اسی طرح اپر اور لوئر چترال، سوات اور گلیشیئر سے منسلک دیگر علاقوں میں بھی خصوصی نگرانی کی ضرورت ہے۔
ممکنہ سیلابی صورتحال کے باعث پلوں، سڑکوں، آبپاشی کے نظام اور دیگر بنیادی ڈھانچے کو نقصان پہنچنے کا خدشہ ظاہر کیا گیا ہے۔ متعلقہ ضلعی انتظامیہ اور ریسکیو اداروں کو ہدایت کی گئی ہے کہ وہ حساس مقامات پر مسلسل نگرانی جاری رکھیں اور ہنگامی حالات سے نمٹنے کے لیے پیشگی انتظامات مکمل رکھیں۔
این ڈی ایم اے نے شہریوں سے اپیل کی ہے کہ اگر گلیشیئر کے قریب غیر معمولی آوازیں سنائی دیں یا پانی کا رنگ اچانک گدلا ہو جائے تو فوری طور پر متعلقہ حکام کو اطلاع دیں۔ اس کے علاوہ سیاحوں اور مقامی افراد کو ہدایت کی گئی ہے کہ وہ این ڈی ایم اے سیلاب الرٹ کے دوران دریاؤں، ندی نالوں اور گلیشیئر سے نکلنے والے پانی کے قریب غیر ضروری آمدورفت سے گریز کریں تاکہ کسی بھی ناخوشگوار واقعے سے محفوظ رہا جا سکے۔
