کراچی (اے بی این نیوز) پاکستان کی اوپن کرنسی مارکیٹ میں ایرانی کرنسی کی مانگ میں ایک بار پھر تیزی سے اضافہ ہوا ہے جس کی وجہ سے اس کی قدر میں نمایاں اضافہ دیکھا جا رہا ہے۔
مارکیٹ ذرائع کے مطابق ایران اور امریکا کے درمیان مشرق وسطیٰ میں جنگ روکنے اور تیل کی عالمی قیمتوں کے حوالے سے غیر یقینی صورتحال میں کمی کے بعد حالیہ دنوں میں ایرانی کرنسی کو نئی زندگی دی گئی ہے۔
اوپن مارکیٹ میں 10 ملین ایرانی ریال کی قیمت میں تقریباً 2000 سے 3000 روپے کا اضافہ ہوا ہے جس کے بعد اس کی قیمت 3500 سے 4500 روپے تک بڑھ گئی ہے۔
ایکسچینج کمپنیز ایسوسی ایشن آف پاکستان (ECAP) کے چیئرمین ملک بوستان کے مطابق پاکستانی خریداروں نے گزشتہ دو دنوں میں مجموعی طور پر 60 ارب ایرانی ریال خریدے ہیں جن کی مالیت تقریباً 250 ملین روپے ہے۔
ان کے مطابق تقریباً تین ماہ کے وقفے کے بعد ایرانی کرنسی کی مانگ میں ایک بار پھر اضافہ ہونا شروع ہو گیا ہے اور زیادہ تر خریداروں کا تعلق کم اور متوسط آمدنی والے طبقے سے ہے۔
ملک بوستان نے کہا کہ ڈھائی ماہ قبل امریکی صدر کی جانب سے جنگ بندی کے اعلان کے بعد ایرانی کرنسی کی خریداری میں اچانک اضافہ ہوا جس کے نتیجے میں 10 ملین ریال کی قیمت چند سو روپے سے بڑھ کر تقریباً 12 ہزار روپے تک پہنچ گئی۔ تاہم بعد میں ایران پر اسرائیلی اور امریکی حملوں کی وجہ سے کرنسی کی قدر میں تیزی سے کمی ہوئی اور یہ قیمت صرف 2 سے 3 ہزار روپے تک گر گئی۔
انہوں نے مزید کہا کہ گزشتہ دو دنوں میں ایک بار پھر طلب میں اضافے کے بعد ایرانی کرنسی کی قدر میںواضح بہتری آئی ہے. انہوں نے کہا کہ سرمایہ کار ایرانی کرنسی میں سرمایہ کاری کرتے وقت محتاط رہیں کیونکہ فی الحال صرف ابتدائی معاہدہ طے پایا ہے جبکہ حتمی معاہدہ ابھی باقی ہے۔
مزید پڑھیں:بلوچستان اسمبلی میں وزیرخزانہ شعیب نوشیروانی نے بجٹ پیش کر دیا،جانیےمکمل تفصیلات
